دۆلار لە 211 هەزار تمەن ئیرانی رەد کەێد و رخ لە سزایەیل ئەمریکی نوویگ زیای کەن
شەفەق نیوز- تاران
دۆلار ئەمریکی وەردەوام بۊ لە بەرزەوبۊنی لە بازاڕ ئازاد ئیرانی، تا لە ئاست 211 هەزار تمەن رەد بکەێد، وە وەراورد وە نزیکەی 200 هەزار تمەن لە هەفتەی گوزەشتە، لە ناوڕاس وەردەوامبۊن فشارەیل لەبان دراو ئیرانی و بەرزەوبۊن رخەیل لە تونەوکردن سزایەیل ئەمریکی و شیویان کەناڵەیل پۊلداین دەیشت.
وەپای نۊترین نرخەیل، نرخ یۆرۆ رەسیە نزیکەی 245 هەزار تمەن، لە وەختیگ پاوەن ئیستەرلینی نزیکەی 285 هەزار تمەن تومار کرد، لە وەختیگ ریاڵ ئیرانی رۊوەڕۊ فشارەیل زیایبۊیگ بوود وە مدوو بەرزەوبۊن خواست لەبان دراوە بیگانەیل و داوەزین تۊانای رەسین ئەرا کەناڵە داراییە ناودەوڵەتییەیل.
ئی پیشهاتەیلە هاوەخت وەگەرد وەردەوامبۊن فشارە ئابوورییەیل لەبان ئیران تیەێد، کە لاوازی دراو ناوخوەیی ئەرا زیایبۊن خەرج هاوردەیل و کەرەستە سەرەتاییەیل و کاڵا بنەڕەتییەیل چوود، ئەوەگ فشارەیل نوویگ خەێدە بان ریژەیل ئاوسان و توانای سەنین ئەرا هاووڵاتییەیل.
نرخ دۆلار لە خود ماوە لە ساڵ گوزەشتە رەساە نزیکەی 95 هەزار و 800 تمەن، واتە دراو ئیرانی زیاتر لە نیمەی بەهای خوەی لە وەرانوەر دۆلار ماوەی ساڵیگ لەدەس داگە.
