دەیان کوشیان و بیسەروشوینی لەئەنجام زریان "ترامی" لە فیلیپین
شەفەق نیوز/ حکومەت فلیپین، ئمڕوو جمعە، راگەیان کە شمارەی کوشیاگەیل لە ئەنجام زریان گەرمی "ترامی" کە رەسیەسە فلیپین، ئەرا ٤٦ کوشیان و ٢٠ بیسەروشوین بەرزەو بوی.
حکومەت راگەیان کە نزیکەی ٢٤٠ هەزار کەس پەنا بەنە ناوەندەیل چووڵکردن، یەیش بیجگە لەوەگ ٧٥١٠ سەرنشین لە بەندەرەیل گیر خواردنە و ئمڕوو ٣٦ گەشت هەڵوەشیاسەو.
سەرۆک وڵات، فێردیناند مارکۆس جونیۆر، فەرمان دا پشتگیرییەیل وەرەو ئەو ناوچەیلە کل بکەێد کە فرەترین زیان وەپییان رەسیە.
بیجگە لەوەیش دەسەڵات وەرگری شارستانی وت: ئەو کوشیان و زەخمدارەیلە لەوەر رمیان زەوی و لافاو و رویداوەیل ترەک لەئەنجام زریانەگە کەفتنە، کە فرەیان لە ناوچەی بیکۆل لە سەنتەر وڵات بوین، کە کەفتنە وەر واران رفتیگ.
ناوەند زریان گەرمی ترامی کە لە ناوچەگە وە کریستین ناسیاس، دویەکە پەنجشەممە، دوورگەی لوزۆن گردەو و تونی واگە رەسیە نزیکەی 100 کیلۆمەتر لە ساعەتیگ، بەشیگ لە وەرپرسەیل ناوچەگە راگەیانن کە بڕ ئەو وارانە لە یەک رووژ واریە چەنە واران دوو مانگ بویە.
جی باسە کە ئمڕوو زریانەگە وەبان دەریای چینی باشوور چوود و وەرەو ڤێتنام روی کەێد، بەڵام دەسەی کەشناسی هوشداری دا کە هەفتەی ئایندە هاتێ گلەو بخوەێد و جویلەی لە کەناراوەیل کەمەو بوود لەوەر دوو شیواز کەشوهەوای نزیک.
