دویەمین لەماوەی 24 سەعات.. خوەنەواریگ کەسیگ کوشێد و یەکیگتر زەخمدار کەێد لەناو مەکتەویگ پۆڵەندی
شەفەق نیوز - وارسۆ
میدیایەیل پۆڵەندی، ئمڕوو پەنجشەممە، خەوەر دان لە کوشیان کەسیگ و زەخمداربوین یەکیگتر لە پەلاماریگ وە چەقوو وەلایەن خوەنەواریگ لەناو مەکتەویگ سەرەتایی لە رویداویگ ک بویە دویەمین لە جویر خوەی لەماوەی کەمتر لە 24 سەعات.
رووژنامەی "گازێتا ویبۆرچا"ی پۆڵەندی خەوەرە دا خوەنەوارەگە تەمەنی 15 ساڵە و پەلامارەگە لە مەکتەویگ لە دەیشت شار ویشکۆف لە باشوور خوەرهەڵات وارسۆی پایتەخت رویدایە، و پۆلیس توەنست دەسگیر کوڕەگە بکەێد.
وتیش قوربانییەگە کارمەنیگ وەرپرس لە چاکسازی مەکتەوەگە و مامووسایگ بویە وە وەکارهاوردن چەقوو، لە وەختیگ زانیارییەیل دیاریکەن ئەرا زەخمداربوین وەڕێوەبەر مەکتەوەگەش لە وەخت دەستوەردانی.
ئاژانس خەوەر پۆڵەندی "PAP" دووپات کرد لە مردن کارمەن چاکسازییەگە کە تەمەنی 37 ساڵ بوی وە مدوو سەختی زەخمەیلی.
لە وەختیگ راگەیاننەیل تر دیاریکردن قوربانییەگە ژنیگ 37 ساڵانە کە کار پاسەوانی لە مەکتەوەگە کەێد.
وەپای قسەی قسەکەر وەناو پۆلیس، کاتارزینا کۆتشارسکا، ژنەگە یەکەم کەس بوی رویوەروی پەلامار بوی وە ئامرازیگ تیژ.
راپۆرتەیل ئاشکراکردن، وەڕێوەبەر مەکتەوەگە دەنگ چڕین ژنەکە ژنەفتییە و تەقەلا دایە ئەرا کۆنترۆڵکردن پەلاماردەرەگە وە دەستوەردان مامووستایگ، باوجی هەردوگیان لە وەخت پەلامارەگە زەخمدار بوون.
وەزارەت ناوخوەی راگەیان بارودۆخ زەخمدارەیل رخدار نییە.
دەسەڵاتەیل ناسنامەی پەلاماردەرەگە دیاری کردن کە خوەنەواریگ وەرین مەکتەوەگە بویە و ئیسە لە مەکتەویگ پیشەیی خوەنێد.
