دویای وایین سەرۆک سەریلانکا.. نادیارییگ لە وڵاتەگە زاڵەو بوود
شەفەق نیوز/ رەوشەیل سیریلانکا، ئمڕوو یەکشەممە، کەفتنە نادیارییگ، ک سەرۆک گوتابابا راجابسکا رازی بوی ئی هەفتە دەس بکیشێدەو، ئەوەیش دویای ناچارکردنی ئەرا وایین لە کۆشکەگەی، ک بڕ مەردم فرەیگ دویای خوەینشاندان گەپیگ لە کۆلومبۆ گیری هاوردن، لەبان ئەو قەیرانە ک وڵاتەگە گردەوەر.
ئەمریکایش، ئمڕوو یەکشەممە، گاڵ سەرکردەیل بانان وڵاتەگە دا ک وەزوی کار بکەن، تا چارەیلیگ ئەرا ئەو ئابووری بەدە لە وڵاتەگە پەیا بکەن، جویر کەمی کارەبا و خوەراک و سوتەمەنی، وەگورەی قسەکەر وەزارەت دەرەوە.
ماهیندا ئەبیواردانا لە وتاریگ تەلەڤزیۆنی وت: ئەوەزا لە ١٣ی تەمووز سەرۆک دەس لە پۆستەگەی کیشێد، ئەرا مسۆگەرکردن گواستنەوەی ئاشتیانە لە دەسەڵات.
دوو کەسیش نزیک لە سەرۆک دەس لەکار کیشانەو، ک سەرۆک خزمەت رووژنامەوانی سودیوا هیتاراشی و وەزیر راگەیانن باندولا گوناوەدانا بوین.
سەرۆک وەزیرەیل سەریلانکا داوا لە رانێل ویکرمسینگ کرد ک لە شوین راجابكسا بوود، گردەوبوینیگ کوتپڕ ئەرا حکومەتەگە بکەێد، وەمینەی چارەی وەزوی، ئەرا قەیرانەگە، وداوا لە سەرکردەیل حزبەیل سیاسیی کرد لەناو ئی گردەوبوینە بوون.
هەمیش ئامادەیی خوەی ئەرا دەسکیشانەوە نشان دا، تا ری وە حکومەتیگ یەکێتی نیشتمانی بیەێد، باوجی ئی هەڵویستیشە نەتوەنست ئەو ناڕەزایلە ئارام بکەێد، ک چینە ناو ماڵ سەرۆک وەزیرەیل وئاگری دان.
سەرۆک راجابكسا، تەمەن ٧٣ ساڵان، توەنست وەماوەی چەن خولەکیگ وەرجە هاتن سەدان لە ناڕەزایل ئەرا ناو کۆشکەگەی بواێد، ک لە نیسان هەنای چینە ناو ماڵەگەی خوەی، لەورا وای وهات لەی شوینە جیگر بوی ک هەمیشە ئەرا ئاهەنگەیل پیشوازیکردن کریایە.
پارچە ڤیدیۆییلیگ لەبان سۆشیال میدیا نشان ناڕەزایلە دان هەنای چینە ناو کۆمەڵگەی سەرۆکایەتی.
پاسەوانەیل بارەگای فەرمی تەقە وەرەو بان کردن تا نەیلن ناڕەزایلە بانە نزیک، تا ئەوەنە سەرۆکەگە دراوردن، وسوار گەشتییگ جەنگی بوی، ک روی وەرەو ئاو هەرێمی باشوور دوورگەگە کرد.
