دادوەری کوەیتی بڕیار لەسێدارەدان 3 توومەتبار وە سیخوڕیکردن وەرد ئیران و حزبوڵا و پلانداینان ئەرا تیرۆرکردنەیل دەرکەێد
شەفەق نیوز - کوەیت
دادگایگ کوەیتی، بڕیارەیل لەسێدارەدان سێ توومەتبار لە دۆسیەی سیخوڕیکردن وەرد ئیران و حزبوڵای لبنانی و پلانداینان ئەرا تیرۆرکردن وەرپرسەیل کوەیتی دەرکرد، لەناویانیش جیگر یەکەم سەرۆک ئەنجوومەن وەزیرەیل و وەزیر ناوخۆ فەهد یوسف، لە وەختیگ بڕیار بەندکردن هەشت توومەتبار ترەک ئەرا ماوەی پەنج ساڵ دا.
رووژنامەی "القبس" کوەیتی، رووژ سێشەممە، باس لەوە کرد کە دادگای تاوانەیل ئاسایش دەوڵەت و کارەیل تیرۆریستی بڕیارەیل لەبان یازدە توومەتبارەگە دەرکرد، دۊای توومەتبارکردنیان وە سیخوڕیکردن و تەقەلا ئەرا ئەنجامداین کارەیل دوژمنکارانە دژ وە کوەیت، و چگن وەناو گرووپیگ قەیەغەکریاگ و زەرەدرەسانی وە بەرژەوەندییە نیشتمانییەیل ئەرا وڵاتەگە.
وەپەی رووژنامەگە، دۆسیەگە توومەتەیل وە پلاندانان ئەرا وەئامانجگردن کەسایەتییەیل و سەرکردایەتییەیل لە دەوڵەت گردیەسە خوەی، لە سان دەسکردن وە وەکارهاوردن تەقەمەنی ئەرا جیوەجیکردن پلانەگە و شڵەژانن و رخبردن. هەرلیوا یازدەیەم توومەتبار وە هاوردن تەقەمەنی ئەرا تواناداین وە ئەو توومەتبارەیل لە جیوەجیکردن پرۆسەگە توومەتبار کریا.
"القبس" لە زوان سەرچەوەیل بڕیارەگە وت کە توومەتبارەیل تەقەلا دانە ئەرا زەرەدرەسانن وە ئاسایش کوەیت و شڵەژانن و لەکەدارکردن ئارامی وە توانای دەسەڵاتەیل ئەرا پاراستن گیان و ماڵ و داراییەیل.
لە لای خوەیەو، ئاژانس "فرانس پرس" لە زوان دوو سەرچەوەی دادوەرییەو وت کە ئەمیندار گشتی هاوپەیمانی ئیسلامی نیشتمانی، حسێن عەبدوڵا مەعتووق، ها ناو ئەو کەسەیلە کە بڕیار لەسێدارەدان کەفتیەسە بانین، وە دەسنشانکردن ئەوە کە یەکیگ لە سزادریایل ترەک وەرجە یە دادگا بڕیارداۊد لە دۆسیەیگ تیرۆریستی لە ساڵ 2016، دۊاتر وەخشین ئەمیری ئەرای هاتیە وەرجە ئەوەگ دووارە دەسگیر بکریەێد لە نیسان / ئەپریل گوزەشتە.
