خانمە وەزیر دەیشت ئەڵمانیا زانێد کە ئەحمەد شەرع دەسی نیەسینێد
شەفەق نیوز/ ئەنالینا بیربوک خانمە وەزیر دەیشت ئەڵمانیا، دویای ئەو قسە و باسەیلە هاتە دەنگ، کە لەبان ئەو وەرپرسەیل نوو سوریا هاتنە بان کە دەسیان نەسەن، هەڵبەت یەکەمیان ئەحمەد شەرع بوی.
بیربوک وت: وەگەرد رەسینی ئەرا دیمەشق پایتەخت دیار دا کە چەوکەفتنی وەرد وەرپرسەیل نوو سوریا دەسسەنین لەناوی نییە، لەیجویر دیدارەیل دیپلۆماسی.
قسەی خانمە وەزیر ئەڵمانیا دویای ئەو باسکردنە هات کە لەبان پارچە ڤیدیۆی پیشوازیکردن لە هاوتەریب فەڕەنسیی جان نۆیل بارۆ وەلایەن ئیدارەی نوو سوریا، نە وەرپرسەیل ئیدارەی نوو سوریا دەسی نەسەنن، ونەیش ئەحمەد شەرع سەرکردەی ئی ئیدارەی نووە دەسی سەن.
بیربوک دیاری کرد کە ئەرام ئاشکرا بوی کە دەسسەنین لەورا نییە.
وتیش: باوەڕ کەم هاوبەشەیلم لەو دیدارە هەمیش لەلایان ئاشکرا بوی، کە وەزیر دەیشت فەرەنسایش دەس نەورد.
خانمە وەرپرس ئەڵمانیا دووپات کرد کە خوەی و هاوتەریب فەڕەنسیی ئەرا سەرکردایەتی نوو سوریا دیاری کردن کە ماف ژن تەنیا باوەتیگ نییە کە پەیوەندی وە ژنا دیرێد، بەڵکم نشانەس ئەرا ئەوە کە چەنیگ ئی کۆمەڵگا ئازادە.
بیربوک وە کوتر گولەبەن لە فڕۆکەگە هاتە خوار لە فرۆکەخانەی ناودەوڵەتی دیمەشق، و لە پارچە ڤیدیۆەیل دیار دا کە ئەوانەگ پیشوازی لە خانمە وەزیر کردن دەسی نەسەنن، تەنیا پیشوازی وە زەردەخەنەیگەو کردن، لە وەختیگ دەس پیاوەیل سەنن.
