حووسییەیل راگەیانن لە ئامانجکردن پاڵاوگەی ئارامکۆ لە سعودیە
شەفەق نیوز- سەنعا
قسەکەر سەربازی وەناو گرووپ حووسییەیل یەحیا سەریع، ئمڕوو یەکشەممە، راگەیان لە ئامانجکردن پاڵاوگەیگ سەر وە کۆمپانیای ئارامکۆی سعودی لە شار جازان، باشوور شانشینەگە، وە فرۆکەیگ بیفڕۆکەوان.
قسەکەرەگە لە بەیاننامەیگ کە ئاژانس شەفەق نیوز وەپیا چگ، وت کە پەلامارەگە پاڵاوگەگە کردیەسە ئامانج، و دووپات کرد کە درۆنەگە "وە وردی رەسیەسە ئامانجەگەی".
هەمیش وت کە ئامانجکردنەگە لە وەڵام ئەوە تیەێد کە وە "دزەکردن دوژمن سعودی" وەسفی کرد ئەرا ئاسمان هەردوگ پارێزگای سەعدە و حەججە لە یەمەن لەڕی فرۆکەیل بیفڕۆکەوان.
وەزارەت وزەی سعودی، شەوەکی ئمڕوو یەکشەممە، راگەیان کە تیمەیل ئاگرکپەوکردن ئاسایش پیشەسازی سەر وە کۆمپانیای ئارامکۆ ئاگریگ دامرکانن کە لە یەکیگ لە دامەزراوەیل سەر وە پاڵاوگەی جازان هیز گرد، وە بی توومارکردن هیچ زەرەدەیل گیانییگ.
و وەزارەتەگە لە بەیاننامەیگ کە لەبان سەکوو "ئێکس" بڵاوی کرد، دووپات کرد کە تیمەیل ئاسایش پیشەسازی لە کۆمپانیاگە وەردەوامن لە گردنەوەر رێکارەیل ئەرا رەفتارکردن وەرد رەنگدانەوەیل رۊداوەگە.
