جنگه‌يل دويه‌تيگ ئيرانى له ته‌هران بويه هووكار كوشيان پياويگ
شه‌فه‌ق نيوز/ ماڵپه‌ڕ كه‌يهان لايف ئه‌لكترۆنى ك په‌يوه‌نديداره وه كاروبار ئيرانى ئاشكراێ كوشيان پياويگ كرد له وه‌خت وه‌رگريكردن له دويه‌تيگ ك وه بوونه‌ێ جنگه‌يلى ناڕه‌حه‌ت كرياگه له يه‌كيگ له ويستگه‌يل مترۆ له ته‌هران.
له‌ى باوه‌ته‌و، گرته‌يگ ڤيديۆيى بڵاو كرياو له‌تى پۆليس ئيرانى ته‌قه له پياويگ ئه‌كه‌ن له ويستگه‌ێ ميترۆ و ته‌له‌فزيۆن فه‌رمييش له‌يوا باسى كرد ك ئه‌و پياوه ناوى ئه‌سغه‌ر ناهيفپور بويه ك گوايا وه چه‌قوو ده‌سدريژى كرده‌سه بان پياويگ ئايينى و كه‌سيگ تريش زه‌خمدار كردگه.
چالاكوانه‌يليش باس له‌وه كردن ك شايه‌تحاڵه‌يل وتنه: ئه‌و پياو ئايينيه قسه وه دويه‌تيگ كردگه له‌وه‌ر جنگه‌يلێ ك وه‌ل شه‌ريعه‌ت ئسلامى نه‌گونجياگه‌و پياويگيش وه‌ناو ئه‌سغه‌ر ناهفيپور وه‌رگرى له دويه‌ته‌گه كردگه وه‌رجه ئه‌وه‌گ پياوه ئاينيه‌گه‌و پاسه‌وانه‌يلى په‌لامارێ بيه‌ن و له‌ى حاڵه‌تيشه بويه‌سه ده‌مه‌قاڵ و پياوه ئاينيه‌گه‌يش زه‌خمدار بويه وه‌رجه ئه‌وه‌گ پۆليس ته‌قه له ناهيفپور بكه‌ن.
جى باسه، چالاكوانه‌يل يه‌يش ده‌رخستن ك ناهيفپور له‌ئاكام زه‌خمداركردنى جيواز كرياگه ئه‌را نه‌خوه‌شخانه، وه‌لێ له‌وه‌ر نه‌زيف خوين گيان له‌ده‌سداگه.
