یەکێتی ئەوروپا دەسمیەتیەیل دارایی زیایە وە بڕ 6.1 ملیار یۆرۆ ئەرا ئۆکرانیا پیشکەش کەێد
شەفەق نیوز- برۆکسل
کۆمسیۆن ئەوروپی، ئمڕوو دووشەممە، رازی بۊ لەبان پیشکەشکردن دەسمیەتیەیل دارایی زیایە وە بڕ 6.1 ملیار یۆرۆ (7.12 ملیار دۆلار) ئەرا ئۆکرانیا، ئەرا سەنین سیستەمەیل وەرگری نوو کە سیستەمەیل وەرگری ئاسمانی و مووشەکەیل و تەقەمەنییەیل و ئامێرەیل رادار لەخوەی گرێد.
یەکێتی ئەوروپا، لە بەیاننامەیگ، دیاری کرد کە ئی پاکەیج یارمەتییە نووە دەریەێدە شان ئەو پلانەیل سەنینە کە وەرجە یە پەسەن کریانە وە بڕ 16 ملیار یۆرۆ، کە 8.35 ملیار یۆرۆ لەلێ وە کردار خەرج کریاگە، وەپای ئاژانس "رۆیتەرز".
بەیاننامەگە، لە زوان سەرۆک کۆمسیۆن ئەوروپی، ئورسولا ڤۆن دێر لاینەو وت: "وەگەرد تونکردن پەلامارەیل رووسیا، تەقەلایەیل خوەمان قایمتر کەیمن ئەرا دەسمیەتیداین ئۆکرانیا ئەرا مقیەتیکردن لە گەلەگەی و وەرگریکردن لە ئاسمانەگەی، ئەوروپا ها شان ئۆکرانیا، و ئەوەگ هەوەجەی دیرێد ئەرای دابین کەیمن لە هەر وەختیگ بخوازێد".
راگەیانن پاکەیجە ئەوروپییەگە هاوەخت بۊ وەگەرد رەسین سەرۆک ئەنجومەن ئەوروپی ئەنتۆنیۆ کۆستا و سەرۆک وەزیرەیل بەریتانی ئاندی بێرنهام ئەرا پایتەخت کێیڤ، ئمڕوو دوەشەممە، ئەرا بەشداریکردن لە ئاهەنگەیل جەژن سەروەخوەیی وڵاتەگە، وەپای وەزیر دەیشت ئۆکرانی ئاندری سیبیها.
سیبیها، لە پۆستیگ لەبان سەکوو "ئێکس"، دیاری کرد کە لیست کەسایەتییە دیارە سەردانیکەرەیل و سەرۆک وەزیرەیل لۆکسەمبۆرگ لۆک فریدن، و سەرۆک مۆڵدۆڤا مایا ساندو، و سەرۆک ئیستۆنیا ئالار کاریس لەخوەی گرێد، و پۆستەگەی وە وینەیلیگ یاوەر کرد کە رەسین وەرپرسەیل ئەرا وێستگەی قەتار لە کێیڤ جیگیر کەن.
