تەهران و تەل ئەبیب هەڕەشە لەیەک دەن
2024-04-10T11:55:00+00:00
شەفەق نیوز/ ریبەر ئیرانی، عەلی خامەنائی، ئمڕوو چوارشەممە، دووارە هەڕەشەی سزادان ئیسرائیل دا، و وت: بایەسە سزای بیریەێد و ئەوەسا سزا دریەێد، لەبان پەلامارەگەی باڵیۆزخانەی ئیران لە دیمەشق، لە وەختیگ وەزیر دەیشت ئیسرائیلیش یسرائیل کاتس هەڕەشەی وەڵامدانی لەناو زەوی ئیران دا، ئەگەر تەهران پەلاماریگ ئیسرائیل بیەێد.
خامەنائی لە وتاریگ وە بوونەی جەژن رەمەزان وت: رژیمەگە شەڕە هەڵەیگ کردیە و بایەسە سزای بیریەێد و ئەوەسا سزا دریەێد.
وەرانەور ئەوە، دویای کەمیگ لە وتارەگەی خامەنائی، کاتس لەبان پلاتفۆرم ئێکس وە زوان فارسی وعبری نویسان: ئەگەر ئیران لە زەوی خوەیەو پەلاماریگ لەبان ئیسرائیل جیوەجی کرد، ئیسرائیلیش لەناو ئیران وەڵام دەێد.
گورزیگ ئاسمانی کە وەرپرسەیل سوریا و ئیران وتن ئیسرائیل ئەنجامی داگە بارەگای قونسوڵخانەی ئیران لە دیمەشق ویران کرد و بویە هوکار کوشیان دوو سەرکردە یەکێکیان گەورەترین وەرپر ئیرانیە لە سوریا وەگەرد ئەندامەیلیگ لە سوپای پاسداران ئیران.
