تەهران پرسەی فەرماندەیل گەورەیگ کەێد و تەل ئەبیب هەڕەشە دەێد

شەفەق نيوز/ تیژی ناوەین ئیسرائیل و ئیران، ئمڕوو شەممە، دویای راگەیانن کوشلتن دووان لە گەورە فەرماندەیل دەسەی ئەرکان لە هیزە چەکدارەیل ئیران بەرزەو بوی، لە ئەنجام گورزەیل ئیسرائیل لە رووژ جمعە، لە وەختیگ سەرچەوەیل ئیسرائیل باس نیاز فراوانکردن پەلامارەیل وەرەو تەرخان کرد.

تەلەڤزیۆن فەرمی ئیران، خەوەردا لە کوشیان غولام رزا محرابی، یاوەر سەرۆک دەسەی ئەرکان ئەرا کاروبار هەواڵگری، و عەمید مەهدی رەبانی، یاوەر سەرۆک کەسەی ئەرکان ئەرا کاروبار ئۆپراسیۆنەیلر لە ئەنجام گورزەیل ئیسرائیل لەناو ئیران.

تەلەڤزیۆن ئیران وتیش: 60 کەس دویای پەلاماردان کۆمەڵەیگ نیشتەجییوین لە تەهران دویەکە کوشیانە، وتیش: 20 مناڵ لەناو ئەو قوربانیەیلە بوین، و تا ئیسە تەرم دە کەس لەلییان دراوریاس.

هەرلیوا، ئێزگەی سوپای ئیسرائیل وت: سەرۆک دەسەی ئەرکان و فەرماندەی چەک ئاسمانی لەناو هەڵسەنگاندن ئمڕوو راگەیانن کە ریەگە وەرەو ئیران ئامادە کریاس، وتیش؛ فڕۆکەیل چەک ئاسمانی ئیسرائیل ئەوەسا دەسکەێدە پەلاماردان ئامانجەیلیگ لە تەهران وەگورەی ئەو پلانەیلە کە دانریانە.

 لەلای خوەییش، کەناڵ 12ی ئیسرائیلی وت: پەلامار ئیران کە دویەشەو جمعە لە ساعەت 21:00، دەسوەپی کرد وە وەشیان نزیکەی 200 مووشەک بالیستی لەناو زەویەیل ئیرانەە بوی، وەبی ئاشکراکرد ئامانجەیل و زەرەدەیلی.

ئی تیژەوبوینە لە سای وەردەوەردەیگ بیوینە ناوەین دوو لایەن تیەێد، وەگەرد رخداری لە چگن ناوچەگە وەناو جەنگیگ فراوانتر.