تەندروسی پاپا فرانسیس کەمیگ خاسەو بویە وەلێ زوان بەساس
شەفەق نیوز/ کاردیناڵ ڤیکتۆر مانوێل فرنانديز، سەرۆک نویسنگەی باوەڕی لە ڤاتیکان، ئمڕوو شەممە، دووپات کرد کە پاپا فرانسیس کەمەکم وەردەوامە لە گلەوداین هازی لە ماوەی خەفتنی لە خەسەخانە، وەلێ خوازێد دووارە باێدە زوان، دویای وەکارهاوردن درویژیگ ئەرا ئۆکسجین تەکان بەرز.
فرنانديز، مەوقەی پیشکەشکردن کتاو شعر نوویگ ئەرا پاپا، ئەو قسەیلە کە باس ئەگەر خانەنشینی پاپا رەت کرد، کە وت: ئەوەسا جویر جارانی تیەێدەو.
وتیش: پاپا پەسا فرە خاسەو بوود، وەلێ ئەو ئۆکسجین تەکان بەرزە مەڵاقی هشکەو کردگە، کە خوازێد دووارە وەگەرد وەزوانهاتن بگونجێد، وەلێ تەندروسیی وەگشتی خاسەو بویە و جویر جاران هاتەو.
پاپا لە تەمەن 88 ساڵە، پەنج هەفتە لە خەسەخانە خەفت، لەوەر هەوکردن سویەی دووانەکی، کە ڤاتیکان لە 6 ئادار/ مارس توومار دەنگ کوڵیگ ئەرای دەرکرد، دەنگی لەناوی وە هەناسەبڕکی و شەکەت بوی.
لە دویاترین بەیاننامەی تەندروسی لەلایەن ڤاتیکان، خەوەردا کە تەندروسی پاپا ئارامە، وەگەرد خاسەوبوین کەمیگ لە هەناس و جویلە، و دی هەناسەدان میکانیکی شەوانە لە 17ی ئادارەو نیەخوازێد، بەڵکم تەنیا لویلەی ئۆکسجین بویچگیگ لەژیر لویتی نریاس.
تا ئیسە مەوقەی گلەوخواردنی ئەرا ڤاتیکان ئاشکرا نەکریاس، لە وەختیگ کاردیناڵ فرنانديز وت: نیەزانێد ئەگەر پاپا توەنێد وەرجە جەژن لە خەسەخانە دەرچوود یا نە.
جی باسە کە پاپا فرانسیس لە دوو ساڵ گوزەشتە، چەن گلەیگ تویش بیماری هات، و هەمیشە تویش هەوکردن سویە تیەێد، کە لە گەنجیی تویش هەوکردن هاتگەر و لەو وەختە یەکیگ لە سویەیلی دراوردنە.
