ترەمپ تواێد ناو "دەریاچەی ئۆنتاریۆ"ی سنووری وەگەرد کەنەدا ئاڵشت بکەێد

شەفەق نیوز- واشنتۆن 

دۆناڵد ترەمپ، سەرۆک ئەمریکا، ئمڕوو سێشەممە، خەوەردا لە تەمای ئیدارەگەی ئەرا ئاڵشتکردن ناو "دەریاچەی ئۆنتاریۆ"، کە هاوسنوورە وەگەرد کەنەدا، ئەرا "دەریاچەی ئەمریکا"، لە سای ناکۆکی بازرگانی ناوەین هەردوگ وڵاتەگە.

 ترەمپ لەبان سەکوو پەیوەندییە کۆمەڵایەتییەی خوەی نۊسان: "ویلایەتە یەکگرتگەیل وە رژدی باس ئاڵشتکردن ناو دەریاچەی ئۆنتاریۆ ئەرا دەریاچەی ئەمریکا کەێد، چۊنکە ئیمە مەزەنەی ئەوە نیەکەیمن کە لەیەودۊا کارەیل بازرگانی فرەیگ وەگەرد ئۆنتاریۆ ئەنجام بیەیمن".

 دەریاچەی ئۆنتاریۆ بۊچگترین دەریاچەس لەناو دەریاچە گەورەیل پەنجگانە لە ئەمریکای باکوور، و کەفێدە بان هەردوگ لای سنوورەیل ویلایەتە یەکگرتگەیل وەگەرد کەنەدا و لەو شارەیلە کە کەفنە بانی شار تۆرۆنتۆیە لە کەنەدا.

جی باسە کە ترەمپ وەرجەیە وە شیوەیگ فەرمی ئاڵشتکردن ناو "کەنداو مەکسیک" ئەرا "کەنداو ئەمریکا" لەڕی فەرمانیگ جیوەجیکردن راگەیانیۊد، ئەوەگ کەفتە گەپجاڕی و رەخنەیل فراوانیگ لەلایەن حکومەت مەکسیکی و سەرۆک مەکسیک کڵاودیا شینباوم، و رەخنەگرەیل وەسفی کردن وە گامیگ کە سڕبردن رەمزی و سیاسی یەکلایەنە دیرێد.

 ئی لێدوان ترەمپە هاوەخت وەگەرد تونەوبۊن وەرەوڕۊبۊنە بازرگانییەگە ناوەین واشنتۆن و ئۆتاوا تیەێد، و دۊای چەسپانن باجەیل گومرگی وە ریژەی 50 لەسەد لەلایەن ئیدارەی ئەمریکییەو لەبان کاڵایەیل کەنەدایی وە بڕ 20 ملیار دۆلار، لە ئەنجام پەککەفتن دانوسەنینەیل ناوەین هەردوگ وڵاتەگە.