ترامپ هه‌ڕه‌شه‌ێ سزا له ئيران ئه‌كا
شه‌فه‌ق نيوز/ دوناڵد ترامپ سه‌رۆك ئه‌مريكى له‌بان ريككه‌فتن ئه‌تۆمى وه‌ل ئيران مه‌ند، وه‌ل په‌شيمان بوينه‌وه‌ێ له يه‌كيگ له ديارترين واده‌يل هه‌ڵوژاردنه‌يلى وه نه‌هيشتن ئى ريككه‌فتنه ك ده‌وڵه‌ته‌يل گه‌وراهيز ئمزاێ كردن وه‌ل ته‌هران وه‌رجه دو ساڵ.
ترامپ له وه‌رانوه‌ر ئه‌وه‌يش هه‌ڕه‌شه‌ێ چه‌سپانن سزا كرد له‌بان ئيران ك په‌يوه‌س نيه وه به‌رنامه ئه‌تۆميه‌گه‌ێ، به‌ڵكوو په‌يوه‌سه وه دو به‌رنامه‌ێ تر سه‌ربازێ جوور ئه‌وه‌گ وه‌رپرسيگ ئه‌مريكى ئاشكراێ كرد.
وه گووره‌ێ فرانس پرێس، وه‌رپرسيگيش ك نه‌تواسگه ناوێ ئاشكرا بكريه‌ێد، له‌باره‌ێ ريككه‌فتن ئه‌تۆمى ك ده‌وڵه‌ته‌يل گه‌ورا وه‌ل ئيران ئمزاێ كردنه له 14ى يۆليۆ 2015 له سه‌رده‌م باراك ئۆباما سه‌رۆك وه‌رين ئه‌مريكى، ئداره‌ێ ترامپ باوه‌ڕێ ئه‌وه‌سه ك ته‌هران پابه‌ند ئه‌دێ وه‌و مه‌رجه‌يله ك ئه‌راێ نرياگه، يه‌يش ماناێ ئه‌وه‌سه هويچ سزايگ ئه‌مريكى له‌بانى نيه وه بوونه‌ێ به‌رنامه ئه‌تۆميه‌گه‌ێ، به‌ڵكوو وه بوونه‌ێ دو به‌رنامه‌ێ تر سه‌ربازيه ك يه‌كيگ له‌ليان ئه‌را مووشه‌كه‌يل باليستيه‌و ئه‌واكه‌يش له‌وه‌ر به‌له‌مه‌يل سه‌ريعه.
