تاران هوشداری دەێد لە ئامانجگردنی: پەلامار بنکەیل ئەمریکی و دەوڵەتەیل ناوچەگە دەیمن
شەفەق نیوز- تاران
بارەگای خاتەمولئەنبیای ئیرانی، ئمڕوو یەکشەممە، هوشداری دا وڵاتە یەکگرتگەیل و دەوڵەتەیل ناوچەگە لە "وەڵامیگ" کە رەسێدە فرەی بەرژەوەندییەیل ئەمریکی لە ناوچەگە.
بارەگاگە لە بەیاننامەیگ وت: ئەگەر هەڵەیگ بکەن، ئەوە گشت بەرژەوەندییەیلیان لە ناوچەگە بوونە ئامانج ئەرا پەلامارەیل وەردەوام و پڕئازار بی هیچ کۆتوبەنیگ یا رەچەوکردنیگ.
وتیش: "لەبان بنەمای زانیارییە رەسیەیل، وڵاتە یەکگرتگەیل بڕیار جەنگ لە دژ ئیران دایە وە رازیبۊن بڕیگ لە دەوڵەتەیل ناوچەگە، و یەیش لە گردەوبوینیگ هاوبەش لە یەکیگ لە دەوڵەتەیل ئەوروپی".
دیاری کرد کە"هوشداری دەیمن کە لە رەوش رۊداین هەر هەڵەیگ لەلایەن ئەمریکاوە وەرانەور ئیران، ئەوە گشت بەرژەوەندی و بنکەیلی لە ناوچەگە کریەنە ئامانج وە پەلامارەیل وەردەوام و کاریگەر و پڕئازار بی هیچ کۆتوبەنیگ یا رەچەوکردنیگ".
هەمیش وت: "هوشیاری دەیمن کە ئەگەر دەوڵەتەیل ناوچەگە، لەڕی وەردەوامبۊن لە سیاسەتە دووفاقییەگەیان لە وەرانوەر ئیران، لایەنگری ئەرا ئەمریکا بکەن، ئەوە گشتیان وە دەسوەردان هەژمار کریەن، و لەی دۊایە نییەتۊنن چەوەڕی دانخوەیداگریدن یا گونجیان لە هیزە چەکدارەیل ئیرانی بکەن".
دۊکە، وەزارەت دەیشت ئەمریکی هوشیاری دا هاووڵاتییەیلی لە دەوڵەتەیل ناوچەگە و عراق، لە هەر ئاڵووزیتربۊنیگ چەوەڕیکریاگ و ئامادەبۊن ئەرا هەڵوەشانن گەشتەیل ئاسمانی.
دۆناڵد ترەمپ، سەرۆک ئەمریکی، وەرجە چەن رووژیگ خەوەر داۊد، کە دیداریگ وەرد هاوپەیمانەیل کەێد لە پەراویز کارەیل کۆمەڵەی گشتی نەتەوە یەکگرتگەیل، ئەرا باس لە بڕیارەگە لەباوەت ئیران.
ترەمپ باس لەوە کرد کە خوەی ئامادە کەێد ئەرا جیوەجیکردن "بڕیاریگ گەورا" لەباوەت ئیران، لە سای دووپاتکردنەیل لە ئامادەبۊن سوپای ئەمریکی ئەرا هەر ئۆپەراسیۆنیگ لە دژ ئیران.
