بەرزەوبۊن ئامار لافاوەیل نیپاڵ ئەرا زیاتر لە 1600 کوشیاگ و بیسەروشوین
شەفەق نیوز- کاتماندۆ
دەسەڵاتەیل نیپاڵ، ئمڕوو پەنجشەممە، خەوەردان لە بەرزەوبۊن ئامار قوربانییەیل و ببسەروشوینەیل ئەو لافاوە تۊنەیلە کە دانە بان وڵاتەگە ئەرا زیاتر لە 1600 کەس ناوەین کوشیاگ و گومابۊیە، کە نیمەیان لە بیگانەیلن.
و دەسەڵاتەیل دیاری کردن کە شمارەی گومابۊیەیل بەرزەو بۊە ئەرا نزیکەی 1500 کەس، لەناویانیش لای کەم 800 بیگانە، لە نیپاڵ و ناوچەی تبت چینی، و ئەوەیش دۊای رمیان دیواریگ لە خەڕگ و کوچگ لە چەمیگ لە کۊیەیل هیمالایا، ئەوەگ بۊە مدوو لافاوەیلیگ تون کە دانە بان ناوچە و دۆڵەیل.
تیمەیل رزگارکردن نیپاڵی فڕۆکەیل هێلیکۆپتەر وەکار هاوردن ئەرا مینەکردن رزگاربۊەیل و وەخوارخستن دەسمیەتی لەناکاو ئەرا هەزاران کەس کە ری لەلیان بڕیاگە دۊای ئەو کارەساتە کە دۊکە چوارشەممە لە ناوچەیگ کۊیەیی سەخت رۊ دا کە پڕە لە گەشتیارەیل و سەردانیکەرەیل و لاسا لە تبت بەسێدە پایتەخت نیپاڵی کاتماندۆ.
پولیس نیپاڵ مەزەنەی بەرزەوبۊن شمارەی کوشیاگەیل کرد ئەرا زیاتر لە 165.
ئاژانس "رۆیتەرز" لە زوان قسەکەر وەناو پۆلیس، ئەبی نارایان کافیلی، وت "شمارەگە بەرزەو بوود، چۊنکە ئیمە پرۆسەیل مینەکردن دەس وەپی کردیمنەو و مەزەنە کریەێد تەرمەیل زیاتریگ پەیا بکریەێد".
وەرپرسەیل لە پولیس و گەشتوگوزار وتن کە نزیکەی 600 بیگانە لەناو 826 کەس بیسەروشوینە لە نیپاڵ.
تەلەڤزیۆن ناوەندی چینی "سی. سی. تی. ڤی" ئمڕوو پەنجشەممە، وت کە شمارەی گومغبۊیەیل لە ئەنجام کارەساتەگە لە کەرت جیرۆنگ تبتی رەسیە 558 کەس، لەناویانیش 260 بیگانە.
دیمەنەیل ڤیدیۆیی کە دڵنیایی لە راسییان کریاگە بڕەیلیگ گەورە لە ئاو و ویرانی نیشان دان کە دەیان کەس لە دەروازەیگ سنووری لە جیرۆنگ وەگەرد خوەیان بەن، وەگەرد بردن ماڵەیل و ریوبانەیل و پرۆژەیل کارەبا لە بان چەمەگە وەرەو نیپاڵ.
کیشاف پراساد باراڵ، کە رزگاربۊیگە و تەمەنی رەسێدە 68 ساڵ و چارەسەری لە خەسەخانە وەرگرێد، وت "لافاویگ گەورە لە خەڕگ وەرەو لای ئیمە هات".
هەمیش وت: "زیاتر و زیاتر بەرزەو بۊد هەرچەنی نزیکەو بۊاد، و وەختیگ دیم دا بە ماڵەگەمان، تەقەلا دام دەس ژنەگەم بگرم و وەرەو باڵکۆنەگە بچم، وەلی خەڕگەگە ئەو برد و دویریەو خست".
هێلیکۆپتەریگ دۊای چوار سەعات وەرەو شوینیگ ئارام بردەی، و وتیش "ژنەگەم هێمان لە شوینیگە لە ژیر خەرگ، ئەو چگ".
راپۆرتە سەرەتاییەیل کە لە وەرپرسەیل لە نیپاڵەو دەرچگنە دەسنشان کەن ئەرا ئەوەگ زەۊلەرزەیگ لە ناوچەگە رۊ داگە و ئەوە بۊەسە مدوو رمیان بەش خوارین لە چەم بەستەڵەکی، کە بۊە مدوو رۊداین ئی لافاوە تونە.
