بێبەش کردن ژنەێلە دە ئەڤغانستان
![بێبەش کردن ژنەێلە دە ئەڤغانستان](https://media.shafaq.com/media/arcella/1631911828504.jpeg)
شەفەق نیوز/ دەوڵەت ئمارەت ئسڵامی ئەڤغانستان، ئمڕوو تابڵاوەگەێ وزارەت ژنان دەرهاورد و دە شوونێ تابڵاو "وزارەت ئەمر وە مەعرووف و نەهی لە مونکەر" نا. وەێ کارەوە دیارە ک ئەو دەوڵەتە دخوازێ ئی وزارەتخانە لە جاتی "وزارەت ژنان" دامەزرنێ.
بێژە یە هێمان بڕێ لە وزارەتخانەێلە، بانگەوازیێگ ئەڕا وە سەر کار گلەو خواردن کارمەندەێل ژن خوەیان نەکردنە و وتنە تا ساختمانەێلەیان ئەڕا جیاوە کردن ژن و پیاگ لە یەکتری خاسوڕاس نەکرێ، نەدهیلن ژنەێلە ئەڵگەردن وە سەر کارەێلەیان.
هەمجا ئی دەوڵەت ئمڕوو هە کوڕەێلە و ئامووژگارەێل مەدرسەێل کوڕانە چڕییە وە سەر کار و هیچ باسێ لە واز کردن مەدرەسەێل دۆتانە نەکردگە.
ئی کارەێل تاڵبانە، کەڵکەڵەێ خستگە دە گیان لاییندارەێل ئەڤغانی بەش و ماف ژنان و چالاکەێل حوقووق بەشەر ئوو دیرێ دەنگ بڕێ لە دەوڵەتەێل دنیا ئوو سازمانەێل جەهانی ک لە خوەیانەو "تاڵبان" گوڕیاگەو دی لەووا ک دکرد نەدکێ، دەرارێگە دەر. ئەوان وتنە ک ئیرێ و رەوەنە ک تاڵبان گرتگەسە وەر، پەسا ناهێمێ گشتێ لە بانان دەوڵەت تاڵبان دکەێ.
دە ئەڤغانستان، هەمیشان گەنترین وەز و رەوش ئێجتماعی-سیاسی دە مل ژنەێلە ودۆتەێلە نریاگە و چمان وە ئەڵگەردیان تاڵبان و دەسهەڵاتدار بیین دوارەێ ئەوان، ژنەێل ئەڤغان لە کوتەکوتەێ جارانیش بکەفن.