"پایان جەهان".. سایەڵیگ کەفێدە شۊن ئەمریکییەیل وهیلێد خوەراک هەڵگرن
شەفەق نیوز - وەدۊاچگن
لە ناوڕاس بەرزەوبۊن رخەیل لە پەککەفتنە تەکنیکییەیل و پەلامارە سایبەرییەیل، و زیایبۊن نیگەرانی لە دەرەنجامەیل زیرەکی دەسکرد، ئەمریکییەیل دەس کردن وە رەفتارکردن جۊر ئەوەگ جەهان خوەی ئەرا سیناریۆیگ کارەساتبار ئامادە بکەێد، وەختیگ رۊ کردنە هەڵگردن خوەراکەیل و ئاو و هەوەجەیل فریاکەفتن، ئەرا رۊوەرۊبۊن ئەوەگ وە "ئامادەباشی ئەرا پایان جەهان" ناسریاگە.
ئاژانس بلومبێرگ نیوز دیاری کرد کە کۆمپانیا گەورەیل فرووشتن تاک وەڕاسی دەس کردنەسە چەودیاریکردن ئی وەرچەرخانە وە ئاشکرایی لە رەفتار وەکاربەرەیل.
هەمیش "وۆڵمارت"، گەورەترین فرووشگایەیل تاک لە وڵاتەیل یەکگرتگ، وت کە داواکاری لەبان بوتڵەیل غاز پرۆپان و ئاو لەبوتڵنریاگ و کەرەستەیل کەمپکردن بەرزەو بۊە، لە وەختیگ "کۆستکۆ" باس زیایبۊن رۊکردن بسینەیل ئەرا سەنین برنج و خوەراکەیل لەقوتینریاگ و کاڵایەیل ترەک کرد کە گونجیەن ئەرا هەڵگردن ئەرا ماوەیل دریژ.
لە لای خوەیەو، کۆمپانیای "تراکتۆر سەپڵای" دووپات کرد، کە فرووشتن مۆلیدە کارەباییەیل و تانکییەیل ئەنبارکردن شلەمەنییەیل و پرۆپان گەشەیگ وەرچەو لەی ساڵە توومار کەن، و ئی چینەیلە ئەرا یەکەم جارە وە خیراییگ گەشە کەن کە لە فرە بڕە بەرهەمەیل ترەک زیاترە، وەپەی ئاژانس بلومبێرگ.
وەپەی ئاژانسەگە، نیک مودی، شیەوکەر لە "ئاڕ بی سی کاپیتاڵ مارکێتس"، دۊنێد کە تیکەڵەیگ لە پەیامە حکومەتییەیل و ئەو نیگەرانییە کە لەڕی تووڕەیل پەیوەندی کۆمەڵایەتی بڵاوەو بۊە بەشداری کردگە لە ئاڵشتبوین دیاردەی ئامادەباشی ئەرا فریاکەفتن لە پەراویزەو ئەرا رەوت سەرەکی وەکاربردن ئەمریکی.
مودی ئاشکرا کرد کە یەکیگ لە پڕیشکە بنەڕەتییەیل رێنمایییگ بۊ کە لە وەزارەت وەرگری ئەمریکی لە کۆتاییەیل سێپتێمبەر لەباوەت ئامادەباشی سەربازی دەرچگ، کە وە شیوەیگ هەڵە لەبان پلاتفۆرمەیل پەیوەندی کۆمەڵایەتی، وە تایوەت "تیک تۆک"، لەیەکەو دریا وە هەژمارکردنی جۊر نشانەیگ ئەرا ئەگەر بڕیان فراوانیگ لە کارەبا کە 90 رووژ وەردەوام بوود.
ئەو هەڵمەتەیل ئامادەباشیە ئەرا فریاکەفتن کە چەن وڵاتیگ وەخوەیان دین، لە ناویان بەریتانیا و ئەڵمانیا و ژاپۆن و نەرویج، بەشداری کردن لە هازدارکردن نیگەرانی لەلای وەکاربەرەیل.
ئی شەپۆلە لە نیگەرانی هاووەخت هات وەرد زنجیرەیگ لە پەککەفتنە تەکنیکییەیل تیەێد کە رای گشتی لە ماوەی هەفتەیل دوایی سەرقاڵ کردن.
خزمەتگوزارییەیل ئیمەیڵ "ئاوتلوک" سەر وە مایکرۆسۆفت و شمارەیگ لە ئامرازەیل بەرهەمهاوردن وەرکەفتنە پەککەفتنیگ لەناکاو لەوەر کێشەیگ تەکنیکی، هەمیش کەرت فڕۆکەوانی ئەمریکی شیویانیگ وەخوەی دی کە بۊنە هووکار هەڵپەساردن گەشتەیل ئاسمانی، لە وەختیگ بسینەیل بانک "جەی پی مۆرگان چەیس" رۊوەرۊی سەختییەیل بۊنەو لە هەواڵەکردن پۊل.
"ئەپڵ"یش لە لیستەگە دۊر نەۊ، وەختیگ ئەویش رۊوەرۊی کێشەیل کارپیکردن بۊەو، هەمیش تووڕیگ پەیوەندی ناوخۆیی نهێنی کە ئاژانس ئاسایش نەتەوەیی ئەمریکی وەکاری تیارێد وەرکەفتە بڕیانیگ لەناکاو، ئەوەگ نیگەرانی لەباوەت دڵنیایی وە سیستەمە دیجیتاڵییەیل زیای کرد کە ئابوورییە نووەیلە پشتیان وەپی بەسن.
لە شان پەککەفتنە تەکنیکییەیل، رخەیل زیای کەن لەو رۆڵە کە شایەد زیرەکی دەسکرد لە ئایەندە بڕانێد، چ لەڕی توانادارکردن لایەنە نەیارەیل لە جیوەجیکردن پەلامارەیل ئەلیکترۆنی ئاڵۆزتر یا لەڕی خێراکردن ئاشکراکردن کەلینە ئەمنییەیل.
راپرسییگ کە زانکۆی کوینیپیاک ئەنجامی داگە ئی مەزاجە ئاڵۆزە رەنگ دەێدەو، وەختیگ دەرخست کە 73 لە سەد لە ئەمریکییەیل هەست وە نیگەرانی کەن لەوەگ سیستەمەیل زیرەکی دەسکرد لە ئایەندە هەڕەشەیگ مان و نەمان ئەرا بان مرۆڤایەتی دروس بکەن بارن.
وەلێ هوشدارییەیل زیای کەن لەوەگ هەر شۆکیگ جیۆسیاسی نوو یا پەلاماریگ ئەلیکترۆنی لەبان ژیرخانیگ گرنگ و زیندوو یا پەرەسەنین لە هوشدارییە فەرمییەیل شایەد بیلێد وەکاربەرەیل روی زویوەزوی بکەن وەرەو هەڵگردن و خوپارێزییەو ئەرا سەنین لەوەر رخ و تۆقیان.