ئاوارەبوین نزیکەی ٢٠ هەزار سودانی لە باشوور دارفور لەناو جەنگ کوشندە
نویسینگەی هەماهەنگی کاروبار مرۆیی نەتەوە یەکگرتگەیل نیگەرانی قویل خوەی نشان دا لەباوەت راپۆرتەیل جەنگ و وەردەوەردەی کوشندە لە دارفور باشوور سودان لە چەن رووژ گوزەشتە.
نویسینگەی نەتەوە یەکگرتگەیل ئەرا هەماهەنگی کاروبار مرۆیی دووپات کرد کە لە نزیکەو چەودیاری رەوشەگە کەێد و کار ئەرا ئاسانکاری رەسانن هاوکاری مرۆیی وەرەو باشوور دارفور کەێد.
وتیش؛ وەداخەوە کە جەنگەگەی ئیسە ریگرە لە رەسین دەسمیەتی لە دارفور وەروو شار نیالا.
وەرپرس هەرێم دارفور، مینی ئارکۆ میناوی، لاڵکیا کۆمەڵگەی ناودەوڵەتی و ریخریاگە مرۆییەیل هاوکاری مرۆیی بڕەسننە هەرێم دارفور، کە کەفتیەسە وەر رەوش "سەخت و کارەساتبار".
لەماوەی چەن رووژ گوزەشتە، جەنگ و وەردەوەردی تونوتیژ لە ناوەین سوپای سودان و هیزەیل پاڵپشتیکردن زویوەزی لە شار نیالا دەسوەپی کردیە، و بویە هوکار کوشیان و زەخمداری، و ئاوارەبوین فرەیگ لە چەن گەڕەکیگ ئەو شارە.
کۆمیساریای باڵای پەنابەرەیل نەتەوە یەکگرتگەیل لە سەرەتای ئی هەفتە نیگەرانی قویلی نشان دا لەباوەت خراوبوین رەوش تەندروسی لە سودان، وەمدوو ئەوەیش شمارەی ئەو کەسەیلە کە وە زوور ئاوارەبوین لە چوار ملیۆن کەس رەد کردیە.
