ئۆرپا له‌وه‌ر جه‌شنه‌يل سه‌رساڵ وشدارى په‌لاماره‌يل ترۆريستى دا
2017-11-18T09:14:00+00:00
شه‌فه‌ق نيوز/ ديمتريس ئه‌فرامبولوس كومسيار ئۆرپى ئه‌را كووچ و كاروبار ناوخوه‌يى، باس له وجوود مه‌ترسى كه‌فتنه‌وه‌ى په‌لاماره‌يل ئه‌گه‌ركرياێ ترۆريستى كرد له ماوه‌ى جه‌شنه‌يل ميلاد و سه‌رساڵ، هه‌ر وه‌و خاتريشه داواى له‌وه‌رگرتن گشت ڕى وشوونه‌يليگ ئاسايشى دا ئه‌را مقه‌يه‌تيكردن شوونه‌يل گشتى.
ئه‌فرامبولوس له لێدوانيگ رووژنامه‌گه‌رى وت: ئى مه‌ترسيه‌يله له‌گشت جه‌هان بڵاو بويه‌و ته‌نيا هه‌ر له ئۆرپا نيه، به‌ڵكوو له ئه‌مريكايش وجوود ديرێد و بايه‌سه گشت ڕى وشوونه‌يليگ ئاسايشى له‌وه‌ر بگيريه‌ێد ئه‌را نواگرتن له‌و مه‌ترسيه‌يله.
جى باسه، ناوبرياێ هه‌ميش وت: ماوه‌ى جه‌شنه‌يل ماوه‌يگه ك هه‌ميشه په‌لاماره‌يل ترۆريستى له‌تيان روێ ئه‌ياد و بايه‌سه وشدار بويمن و خوه‌مان ئاماده بكه‌يم ئه‌را روى وه‌ڕوێ بوينه‌وه‌ى هه‌ر مه‌ترسييگ.
