ئيران خوازياره مامڵه‌ى بازرگانى وه‌ل چوار ده‌وڵه‌ت بكا دوير له دۆلار
شه‌فه‌ق نيوز/ عه‌لى ئه‌كبار ولايه‌تى راوێژكار رابه‌ر شۆڕش ئسلامى ئيران ئه‌را كاروبار ناوده‌وڵه‌تى، ئاشكراى ئه‌وه كرد وڵاته‌گه‌ى باس ئاڵشتوئوڵشت بازرگانى وه پويل نيشتمانى ئه‌كا له‌جياى دۆلار ئه‌مريكى وه‌ل هه‌ر يه‌ك له روسياو چين و هند و توركيا.
ولايه‌تى له وته‌يگ وه‌بوونه‌ى ساڵياد 90 ساڵه‌ى دامه‌زرانن بانك ملى، وت: بڕياره پاريزگار بانك ناوه‌ندى ئيرانى چه‌وديرێ مه‌سه‌له‌ى پشتبه‌سانن وه ئاڵشتوئوڵشت بازرگانى بكا وه‌ل روسيا وه هه‌ردوگ دراو روبل و ريال.
جى باسه، ولايه‌تى هه‌ميش وت: ئيسه‌يش گفتگوو ئيران وه‌ل چين و توركياو هند وه‌رده‌وامه ئه‌را جيوه‌جيكردن ئاڵشتوئوڵشت بازرگانى له‌ڕێ دراوه‌يل نيشتمانى و باس له‌وه‌يش كرد ئى ئه‌زموونه له چه‌ن ده‌وڵه‌تيگ له جه‌هانيش جێوه‌جى كرياگه‌و له‌وانه‌يش كۆمه‌ڵه‌ى بريكس(به‌رازيل، روسيا، هند، چين، باشوور ئه‌فريقيا).
