يه‌كه‌مين وه‌يه‌كڕه‌سين كورد و رووس كه‌ى بوى؟
ڤێكینگه‌یل دوچار نه‌خوه‌شییگ خه‌ته‌رناك بوین و شماره‌یان رووژ وه ڕووژ روى له كه‌مى كردیاد، له‌كووتاییش ئه‌وانه‌گ وه‌ساق ده‌رچین سه‌ر خوه‌يان هه‌ڵگرتن وه‌ره‌و نزیك ئاو "كورا"و شار به‌رده‌عه‌يش هیشتنه جى, دى ئه‌وه بوى وه‌ل خوه‌یانا بريگ جه‌واهیر و سكه‌ى ئاڵتوین و چشته‌يل گرانقیمه‌ت بردن.
وه‌ل ئه‌وه‌یشا "T . J Ame" مێژوونويس سویدى له‌باوه‌ت شار به‌رده‌عه‌و ده‌ورگردى نویساگه: مه‌رزوبان ناچار بوى وه‌ل به‌ش فريه‌یگ له‌پیاوه‌یلیا شار بیلیده جى ئه‌را ئه‌وه‌ك بچێد راپه‌ڕینیگ له ئازه‌ربایجان كپه‌و بكاو ئه‌را ئه‌و مه‌راميشه بريگ له فه‌رمانده‌یل خوه‌ى وه‌تایبه‌ت 1500 سوارخاس كورد وه‌ليا بوينه، وه‌لى هویچ زانیارییگ له‌باوه‌ت چاره‌نویسیان ئاشكرا نه‌كردگه.
وه‌لى هه‌ر له‌ى باوه‌ته‌و ئبن نیسكه‌وه‌یه ئویشید: گشت مه‌ردم شاره‌گه بیجگه ئه‌وانه‌ك سوار ئه‌سپ بوینه شكیانه‌سه‌و، یه‌یش وه‌و ماناسه ك كورده‌یل زه‌ره‌د فريه‌يگ وه‌پيان نه‌ڕه‌سيه، چوینكه زوورم كورده‌يل وه سوارى ئه‌سپه‌و به‌شدارى ئه‌و په‌لاماره كردنه.
ڤێكینگه‌یل ك وه‌پیانیش وتریاس ڕووس، وه‌چه‌ن هه‌زار كه‌سیگه‌و جوور ئه‌وه‌گ ئاماژه وه‌پيان كرياس له‌ساڵ 943چینه ناو شار به‌رده‌عه‌و شاره‌گه تاڵان كردن و مه‌ردمه‌گه‌یشى ده‌سگیر كردن.
ئمجا مێژوونويسه‌يل پشتگیرى ئه‌و فكره ئه‌كه‌ن ك یه‌كه‌مین وه‌یه‌كڕه‌سین كورد و ڤێكینگه‌یل بويه له‌سه‌رده‌م ڤێكینگه‌یل وه‌رجه 1000 ساڵ و له‌ساڵ 1929يش له‌ناوچه‌ى "گوستاف فرۆیل" له گۆتلاند سكه‌یگ كوردى دوینریاوه ك له‌شار به‌رده‌عه له‌سه‌رده‌م حوكمڕانى شازاده "دایسام كوڕ ئبراهیم كوردى" دروسكریاس، ئمجا ئه‌و سكه‌ى كوردیيشه ك له ساڵ 936 - 937 دروس كریاگه تا ئیسه‌یش وه‌ل سكه‌یل تر خوه‌رهه‌ڵاتى له "ستۆكهۆڵم" پايته‌خت وڵات سويد مقه‌یه‌تى له‌لى كریاگه.
رۆهات ئاله‌كۆم
