کوتەڵ وگیرستن میراتی کۆنەیگە لە شارستانیەیل عراق

2022-09-14T12:05:36.000000Z

شەفەق نیوز/ لە دەقەیل سۆمەری وبابلی، فرە لەو ئەفسانەیلە هەس ک باس زنیەوبوین (تەموز) خودایان کرد، ک ئەفسانەی بابلی باس ئاهەنگیل سەرساڵ نوو کەێد، ک ساڵانە لە وەهار سازیەێد، هەنای خودای دیموزی (تەموز) کوشیەێد، باوجی خودای (عشتار) لە جەهان خوارین ئازادی کەید، ئەوەیش دویای چەن رووژیگ لە گیرستن و کوتەڵ، تا دووارە زنیەو بوود.

ئەو خەفتەیلە لە سەردەم شەفەق نەوەیل لە نزیکەی ٣٢٠٠ وەرجە زایینی بویە، ک لە بابل دەسەیل ئاینی ساڵانە وەناو جادەیل رەد بوون، تا چەمەری ئەرا تەموز بکەن، ک خودای نەختی وئەوزەڵکردنە، ک دویای ئەو ئاژاوە و بەدی کەفتە بان زەوی، و عشتاریش ئەرای گیرێد.

کاهنەیل ئی دەسەیلە ڕێک کردیان، ک شاهیش لەناوی بەشداری کردیاد، و وەناو دەروازەی عشتار رەد بوون، و تا دوانزە رووژ وەردەوام بوود، ولە رووژ هەفتەم درامایگ دروس کریەێد، ک نشان مردن خودای تەموز وزیانەیلی دەن، وەشیوەیگ ک هیلێد جەماوەرەگە بکەفنە هیستریای گیرستن و ناڵە، و پڕتاڵ خوەیان دڕن.

ئی ئاهەنگەیلە لە پەرستگای مەردوخ نزیک چەم فورات تەواو بوون.

ناڵەی عشتار ئەرا تەموز، ساڵ لە دویای ساڵ جویر وزەیگە ئەرا نووەوکردن بنەمای زەوی -نەختی- ژیان، ک زنیکردنە ئەرا بنەمای ناڕەزایی و نواگردن ستەم.

خەفەت وگیرستن لە کۆنترین سەردەمەیل کۆمەڵگایل خوەرهەڵاتە، و کاریگەریی لەبان گشت ئاینەیل ئاسمانی و شارستانیەیل کۆنە دیارە، چوینکە لە سرووشت ئی کۆمەلگا وەزوی کاریگەری بوود، و هەمیش لە مردن ئەنانا لە دەقیگ سۆمەری ئەو چەمەری وکوتەڵ ودهوڵ کوتانە نشان دەێد.

بەشیگ لە دەق خەفەت ئەرا ئەنانا (عشتار):

 

                  من وەرەو جەهان خوارین داوەزم

                    لەناو کەلاوەیل پرسە ئەرام بنە

                 دهوڵ لەناو پەرستگا ئەرام بکوت

               ئەرا من بگەردە دەور ماڵەیل خودایل

                    بیە ناو چەو خوەد ئەرا من

                    بیە بان دەم خوەد ئەرا من

                       کوتەڵ بکە ئەرا من

              جویر گەیاکەر پڕتاڵ شڕیگ بپووش.

Shafaq Live
Shafaq Live