كوڵه‌باسێگ له‌باره‌ی هووزه‌يل كورد له سه‌ده‌يل ناوڕاس
ئانی: نيشته‌جييه‌يل ويلايه‌ت ده‌ره‌ته‌نگ كوردستان وه حساو ئه‌يه‌ن، ئه‌ی ويلايه‌ته وه ده‌س شازايه‌يل هووز ده‌ره‌ته‌نگ حوكم له سه‌رێ كرياس.
به‌شيری: نيشته‌جييه‌يل كورد ناوچه‌ی نوعمانيه و نه‌هره‌وان و واست عيراق وه حساو تيه‌ن، تويه‌نستن سه‌رزه‌مين په‌يه‌نێگ ئه‌را خوه‌يان تا نزيكی حلله داوڕن و ئه‌ی هووزه له‌ی ناوچه‌و له سه‌رده‌م عه‌باسييه‌يل وه شيوه‌ێگ فره بڵاو ژيان كردنه. وه‌گوره‌ی نويسرياگه‌يل مێژوونويسه‌يل، فێشتر ئايمه‌يل ئه‌ی هووزه كورد گاوان(جاوانی) بوينه.
پوڵاوه‌ندی: ئه‌ی هووزه له ناوچه‌يه‌ل دينه‌وه‌رو نه‌هاوه‌ند له هه‌رێم كويه‌يل(خوه‌رهه‌ڵات كوردستان) بوينه‌و له سه‌رده‌م ئماره‌ت حه‌سنه‌ويه برزيكانی تا ئيسه‌يش تويه‌نستنه ناو مێژوويی خوه‌يان بپارێزن و هه‌ر ئيسه‌يش له ئاواييه‌يل نه‌هاوه‌ند و چابلوق ژيه‌ن.
جارباقه: ئه‌ی هووزه له ناوچه‌يل جيا‌جيا له زنجيره جه‌وه‌ڵه‌يل (خوه‌رهه‌ڵات كوردستان) جوور: حه‌لوان، خانه‌قين و قه‌سر شرين ژيه‌ن. گومان ئه‌وه چوود ئه‌ی هووزه توخماره‌ی ره‌سن گوران(ئيسه) بوون.
جروگان(جروان): جی نيشتهجی بوين ئه‌ی هووزه له كوردستان خاس ديار نيه‌و پسپۆره‌يل نه‌تويه‌نستنه تا ئيسه جی نيشتهجی بوينيان وه خاسی دياری بكه‌ن.
هاوردنه: ماجد كوردی جروانی يه‌كێگ له شێخه‌يل ناودار عێراق له ئه‌ی هووزه بويه. ماجد كوردی جروانی يه‌كی له دووسه‌يل نزيك شێخ گيه‌لانی وه حساو تيه‌ێد ك له قوسان(ناوچه‌یگ له ناوه‌ين نوعمانيه و واست) عيراق ژياس. وه ئه‌ی مه‌مه‌ره‌يشه گومان ئه‌وه چوود ك هووز جروگان(جروان) له‌ی ناوچه نيشتهجی بوينه.
چنكرويی: يه‌كێگ له هووزه‌يل لوڕه، ئه‌ی هووزه له پاچه‌ی گول له ويلايه‌ت مانرود له هه‌رێم لوڕستان نيشتهجی بوينه. وه‌ڕيه‌وبه‌ره‌يل ئه‌ی هووزه تويه‌نستنه له سه‌ده‌ی ١٩ زايينی حوكمڕانی ئيماره‌ت لوڕستان بويچگ بكه‌ن.
جۆرقان(گوران): يه‌كێگ له گه‌وراترين هووزه‌يل سه‌رده‌م عه‌باسييه‌يل وه حساو ئه‌يه‌ێد. ئه‌ی هووزه وه‌ل هووز يه‌عقوبی له ناوچه‌يل خوه‌رهه‌ڵات و ده‌وروگرد كويه‌ی جودی ژيانه.
ئبن ئه‌سير له باوه‌ت ئه‌ی هووزه نويساس: جورقان يه‌كێگ له گه‌وراترين هووزه‌يل كورديه ك له ناوچه‌ی حه‌لوان ژيان كه‌ن و ناويان وه كوردی گوران يا گورانانه.
