عراق وە ئێران: نواێ رمیان تاق و سیس کەسرا بگرن
شەفەق نیوز/ موحەمەدحەسەن تاڵبیان، موعاون میرات فەرهەنگی و گەشتیاری ئێران، دە رووژ مووزەداری وت: ئیمە ئەڕا یە ک‌نواێ خراوە بیین سیسەگەێ "تاق کەسرا" ک یەکێ لە گەپترین ماڵەێل گەور دەوران ئێران ساسانییە و ها دە نزیکەێ بەغدا بگریمن، تا ئێسە چەن جار نامە و داخواز کل کردیمنە ئەڕا دەوڵەت عراق ک ئەوان هە وە لادەمێگەو جواومان دانە و وتنە ک ئی قەسرە ئێسە ها نام خاک عراق و ئیمە بایەدە وە شێوەیێگێ رەسمی ئیوە بچڕیمن و هە لەێ‌وا نەدبێ.
ئەوی وت: ئیمە دەێ ناوە، چەن جاریش لە ستاد بازسازی عەتبات عالیات ئێران، پەیجووری کردیمنە و یەیش وتیمنە ک قەور "موسڵم کوڕ عەقیل"یش ها ئەڵەورەێلە ک وە سنگەێ ئەو قەورە و تاق کەسرا دتوانیمن کار گەپێ دە ئەو ناوچە بکەیمن ئوو گشتێ وەمان دوتن ک چەمەڕێ یەنە ک دەوڵەت عراق بچڕێگەمان ئەڕا یارمەتی داین.
تاڵبیان وتگە: وەێ دومادوما نامەیێگ لە وزارەت دەرەوەێ عراق هاتگەسە دەسمان ک دتوانیمن تەفاهوم‌نامەیێگ ئەڵ بانێ بنووسنیمن و دەورەێلە دەس وە کار ببیمن.
ئەوی وتگە: چوون ئی ماڵە دە دنیا چشت گەور و بهەرز و یەکڵانەیێگە، ئەڕا یە ئیمە هەم وەگەرد یونسکۆ ئوو هەم ئیکۆم، چەن جارێ قسە کردیمنە ک ئیکۆم وتگە دیاێگ و بەشداری دکەێ دە ئی پڕۆژە ئوو ئیمە داخۆازمان یەسە ک یە بکەیمنە جمێشت جەهانیێ چوون ک دزانیمن ئەنجام داین ئیجوورە کار گەپێگیش ها پێمانەو ئوو ئیمە لە گشتێ فرەتر زانست مەرەمەت و کار دە بنایەێلەێ هووز ساسانی دیریمن.
خاسە بزانن؛ چەن جار بان ئەڵ بان و وەر ژە یە دووسخوازەێل میرات فەرهەنگی، وە نامەێل فرەیێگ لە یونسکۆ داخواز کردنە ک ئی قەسرە دە نام پێڕز "میرات جەهانی" بنن تا کەسێ نەوێرێ خراوێ بکەێ ئوو دەوڵەت عراق بنێگە مل خوەێ ک ویرێ وەێ قەسر گەور و گەورا ببێ ک گەپترین تاق و سیس خشتی دە دنیاسە.
وزارەت فەرهەنگ عراق، وەر ژەیش، هەر چەن جواو خوازیارییەێلەێ ئێران نەداگە باوجی دە ساڵ 2020 ئوو ده نامەیێگ وە "بنیات ئەلێف" لە ئەوان یارمەتی خواستگه و وتگە ئەڕا موتاڵعە و نجات‌بەخشی لە سەرەتا 700هزار دولار بوودجه وە گەرکە.
ئی بنیاتە دە ساڵ 2017 ئەڕا خاتر نواگیری لە خراو و خاپوور کردن ئەو هەمگەێ ماڵ گەور و گەورا، بنەڕاێ نریاگە.
یەیش بزانن؛ بنیات ئەلێف دە مانگ نۆوامبر 2020 ماموورییەتێ ئەڕا نواگیری لە خراو بیین تاق کەسرا وەگەرد زانکۆ پنسیلوانیا تاریف کردگە ک هەم فیلم و 3Dیەێلێ فرە خاس لەو قەسرە کیشاگە هەمیش سنسۆرەێلێ ئەڕا ویرداری لەو شەق و تەرەکەێلە ک دەو قەسرە و دە بان دیوار و دەور و گرد بنەواێلەێ کەفتنە، ناگە.
