شەهاب وەهاب روسەم لە کتاو باوەگەزی ئویشێد
شه‌فه‌ق نیوز/ هەنای شۆڕش کوردستان دەسکردەپی لە ئەیلول ١٩٦١، باس شۆڕشەگە باس گشت خەڵک خانەقین بوی، لەگشت شوینیگ و لەگشت ماڵیگ، لە گەراجەگە ک باوگم لەناوی کارکەێد، خاوەن دوکانەیل پەیوەندی وەیەکەو داشتن، هەرچەن تەمەنو پیشەیلیان جیوازبوی، یە ئاسنگرە یە فیتەرە، مەحمود ئۆتیچی هەمیشە هاتیاد ناو ئەو دانیشتنەیل قسەو باسە لەناو گەراجەگە، باس گشت خەوەریگ نوو کردیان، وهەرچەگ لەناو سەریان بویاتاد، یەگجا ژنەفتم باس شۆڕش تەموز کردیان، ناو عەبدلکەریم ومەڵا موستەفا هاوردیان، چوین هاتیەسەو لە یەکێتی سۆڤێت، یەکیگ لە جارەیل باس رەوشەگە کردیان وکردارەیل پیاوەیل ئەمنو هەواڵگیری لە شارەگە چوین ئەو گەنجەیلە دەسوەسەرکەن ک لاین سیاسین، (مەشەی ئەڵماس) ک شۆفێریگە وت؛ براگانم، ئی رەوشە هەوەیجوورە مینیگەی، تا شۆڕش کوردستان سەربکەفێد، وەلی ئی شۆڕشە دریژە کیشێد، باوەڕ نەیرم ئیمە بەرەگەی بخوەیمن، ئیجا نووڕستە پیمەو ومنیش مناڵیگم، وەپسکەخەنەیگەو وت؛ شایەت کوڕەگەی خاڵو وەهاب ئەو سەرکەفتنە بوینێد و ئارامییگ لەسای ئەوە گوزران بکەێد.
چشتیگ نەمەن حکومەتەگە وەخانەقین وخڵکەگەی نەکەن، ئی شارە زانیاگە ک شاریگ کوردە، بەڵکم لەوەخت دروسکردن ئی حکومەتە دویای جەنگ جهانی یەکەم، هەوڵدا وەگشت شیوەیگ تەعریب شارەگە بکەێد، لە شەسەگان نەهیشتن هویج چشتیگ بادەناو شارەگە، ئەگەر خواردەمەنی بهاتادە ناو سزای بازرگانەیلە دیان، خاوەن دوکانەیل بایەسە موڵەت لە ئەمنەیلە بوردیان تا لەبەغدادەو چشت بسەندیان، خاڵەیل وەشکنین و ئازازو خوەیان تاڵان لەبارەیلە کردیان، لە خاڵ وەشکنین مەنسوریە بانزین ماشینەگان وەشکانیان، ئەگەر بانزین لەتی بویاتاد زیاتر لەوەی ک بڕەسنێدەی خانقین، تانکی ماشینەیلە چوڵ کردیان، وهەمیشە قسەی گەن وەسوارەیل کردیان وەبی هویچ رێزیگ ئەرا گەورایگ یا بویچگیگ.
خاڵو کازم، تەکسی ئیستێشنیگ داشت، ناوبەین خانەقین و بەغداد کارکردیاد، رەنگ ماشینەگە جوور رەنگیگ خاکی بوی، لە خاڵ مەنسوریە گیری هاوردن، ک سوپای سوریا و ئوردن لەتی بوی، وەتنەپی؛ بایەسە رەنگ ماشینەگەد ئاڵشت بکەێد، چوینکە هەروەختیگ رەسێدە لای خاڵەگەمان گومان کەێمن ک ماشین ئەفسەریگ لە سوپا هاتیە، ئاخری خاڵو کازم بیچارەبوی ک رەنگ بۆنید ماشینەگەی بکەێدە کەو تاریک، وهەرکەسیگ پرسی ئایا ئەرا رەنگ ماشیند ئاڵشت کردیدە؟ وتیاد: ترسم برا سوری وئوردنیەیلە بتوریەێن لەلیم.
