دیالە.. هەوڵیگ ئەرا دیاریکردن کۆشکیگ ١٢٧ ساڵان جویر موزەخانە
![دیالە.. هەوڵیگ ئەرا دیاریکردن کۆشکیگ ١٢٧ ساڵان جویر موزەخانە](https://media.shafaq.com/media/arcella/1660377987506.jpg)
شەفەق نیوز/ فەرمانگەی ئاسەواری و کەلەپوور دیالە، ئمڕوو شەممە، تەقەلایلی ئەرا دیاریکردن کۆشک جاف ئاسەواری لە ناحیەی سەعدیە جویر مۆزەخانە وشوینیگ کەلتووری راگەیان.
ئەحمەد عەبدولجەبار خەماس وەڕیەوبەر فەرمانگەگە ئەرا ئاژانس شەفەق نیوز وت: کار ئەرا دروسکردن تیمیگ تایبەت هەس، وە سپۆنسەر ریخریایەیل (Iccrom) وilAf) ک پسپۆڕن لە کەلەپوور جهانی سەروە یونیسکۆ، وە سەرپەرشتی فەرمانگەی ئاسەواری لە دەزگای ئاسەواری و کەلەپوور گشتی، وئەوەسا ئی کارەیلە ئمساڵ بوود.
خەماس وتیش: ئیرنگە کۆشکەگە ها خاسەوکردن جویر یەکەم گامیگ لە فریاکەفتنی، ک گەناڵخە هەڵگریەێد، و دیوارە زیایەیل لاوریەێد، وئەو بەشەیلە ک توان بکەفن قایم کریەن، و وسانن تکەی وارانیش، ودیاری کرد ک دویەم گامەگە دووارە ئاوەدانکردن بیناگە وە تەواوی و دروسکردن تەیمانیگ ئەرا مقەیەتیکردنی، و گلەوداینی جویر جارانی.
وتیش: سێیەم گام کارەگە ئامادەکردن کۆشکەگەس تا بوودە موزەخانەیگ کەلتوری ئەرا چشتەیل ئاسەواری و پیشەیل دەسی، و شوینیگ کەلتوری ئەرا شار سەعدیە، ک شایستەی شوین میژووی بوود.
بیناکردن کۆشک جاف چوودەو ئەرا ساڵ ١٨٩٥، ک مەحمود پاشای جاف دروسی کرد، و پەیوەندی وە کەسایەتی عەلی بەگ جاف دیرێد، و رووبەرەگەی رەسێدە ٢٥٠٠ مەتر، لە ناحیەی سەعدیە سەروە قەزای خانەقین.
ئەو کۆشکە لە شوینەیل دیار و گرنگە، و دوو قاتە، دوو رز کەوانی لە قاتەیل بان وخواری دروس کریاگە، و ٨ ژوور و ٤ هۆڵ هاناوی، و لەناوڕاسی گومەزییگ هابانیەو، و چەن گومەزییگتر نەقشەیل ئەندازیاری ڕەنگینی دروس کریاگە.
لە هەردوگ شان کۆشکەگە، ئەماریگ ئەرا دان وبەرهەمەیل کشتوکاڵی، و ژوور میوان دروس کریاگە، ک وەدەس چەتەیل داعش لە ٢٠١٤ کەفتە وەر زەرەد گەورەیگ.