دهۆک.. مەزاریگ ئاینی و قەورسانیگ کوینە لەناو ئاو دەریاچەی بەنداو مووسڵ دەرکەفن.. وینە
2023-03-06T13:40:09+00:00
شەفەق نیوز/ وەرپرسیگ ناوخوەیی لە پارێزگای دهۆک، ئمڕوو دووشەممە، ئاشکرای دەرکەفتن مەزاریگ ئاینی ئەرا ئێزدیەیل و دەیان قەور هن یەکیگ لە ئاوایەیل کوینە کرد، لەوەر داوەزین ئاست ئاوەگە.
حەمزە عیدو موختار ئاوای خانک باشوور دهۆک، لە باکوور دەریاچەی بەنداو مووسڵ، ئەرا ئاژانس شەفەق نیوز وت: دویای داوەزین ئاست ئاو دەریاچەی بەنداو مووسڵ وەشیوەی گەورەیگ، مەزنڵگای شێخ بایەزید کەفتە دەیشت، ک مەزاریگ ئاینی ئەرا ئێزدیەیل بویە، و لە شانی قەورسانیگ دەیان قەور خەڵک ئاوایەگەیش.
عیدو وتیش: میژوو ئی قەورسانە ئەرا زیاتر لە ٢٠٠ ساڵ گلەو خوەێد، هەناێ خەڵک ئاوایەگە مردگیان لەیرا نیانە خاک.
موختار ئاوایەگە وتیش: تا ساڵ ١٩٨٥ چیامنە سەردان ئی مەزارە، و دویای پڕەوکردنی وە ئاو ئەرا بەنداوەگە حکومەت عراقی ئەو مەوقە خەڵک ئاوایەگە لەیرا بار کرد، دویای ئەوە ک ئاواییەگەمان و شمارەی فرەیگ لە مەزارەیل ئاینی کەفتنە ژیر ئاو.
