خانمه كورديگ يه‌كه‌م قويخای ئافره‌ت
له خوه‌رهه‌ڵات كوردستان، وه‌تايبه‌ت ناوچه‌ی لوڕنشين و به‌ختياريه‌يل ئافره‌ت ئازاو ناودار هه‌ڵكه‌فتگه وه چه‌واشه‌ی ئافره‌ته‌يل تر هاوچه‌رخ خوه‌يان، ك ته‌نيا له‌ناو ماڵ نه‌نيشتنه، به‌ڵكوو هاتنه‌سه ناو مه‌يدان سياسی و كومه‌ڵايه‌تی و ته‌نانه‌ت جه‌نگيش كردنه‌و وه‌رگرييش له خاك و نيشتمانيش كردنه.
خانم "قه‌ده‌م خێر" و "بی بی مه‌ريه‌م به‌ختياری" دو كه‌سايه‌تی گرينگ سياسی ز كومه‌ڵايه‌تی مێژوو خوه‌رهه‌ڵات كوردستانن. له مێژوو هاوچه‌رخيش خانم "نازته‌ڵا كوشكی" يه‌كيگه له ئافره‌ته‌يل ئازاو كاريگه‌ر مێژوو لوڕستان.
ئه‌را يه‌كه‌مين جار ئافره‌تيگ كورد لوڕ جوور قويخا ده‌سڵاتداريتی هووزيگ گه‌ورا ئه‌گريده ده‌س، له‌و سه‌رده‌مه وجوود ئه‌و ئافره‌ته جوور قويخا كاردانه‌وه‌ی فريه‌يگ له‌شوونی بويه‌و رووژنامه‌يل ئه‌و وه‌خته گرينگ فراوانيگ وه‌پی دانه.
خانم نازته‌ڵا له‌و وه‌خته ته‌مه‌نی ٣٥ ساڵ بوی و يه‌كيگ بويه له كه‌سايه‌تيه‌يل ناودار هووز گه‌ورای كوشكی. هووز كوشك له‌ناو مێژوو لوڕستان وه هووزيگ ره‌سه‌ن و ده‌سڵاتدار ناسريانه، ناو ئه‌و هووزه له كوشك و قه‌ڵا و شوون به‌رز وه‌رگيرياگه‌و ئه‌ندامه‌يل ئه‌و هووزيشه وه كوشكی ناسريانه.
دكتۆر ئه‌مانوڵاهی له كتاو جوگرافيای لوڕستان له‌باوه‌ت هووز كوشكی نويساگه: شوون سه‌ره‌تايی كوشكيه‌يل له باكوور شار خوه‌ڕه‌م ئاوا ناوه‌ند پاريزگای لوڕستان بويه‌و ئيسه‌يش له كوده‌يشت و ناوچه‌يل تر لوڕستان بڵاوه‌و بوينه.
هووز كوشكی دابه‌ش بوينه له‌بان چوار به‌ش، به‌ش كوشكی سه‌رته‌رهان(كوده‌يشت) و كوشكی ديركووه‌ند و كوشكی پاپی و كوشكی داراب(ئاميران).
ئی هووزه جوور كووچه‌ر ژيان وه‌سه‌ر بردنه‌و له كويه‌و كوساره‌يل تا ده‌يشت و ناوچه‌يل گه‌رمه‌سير پاريزگای لوڕستان بڵاوه‌و بوينه.
وه‌ل ئه‌وه‌يشا مێژوو هووز كوشكی ده‌يه‌ها قويخا و كه‌سايه‌تی جوور شێخ عه‌لی و حاجی موراد و بابا نازار(ميرشكار)و حسێن قولی و محه‌مه‌د عه‌لی و نه‌زه‌ر به‌يگی ديريد.
خانم نه‌زته‌ڵا ئه‌ندام هووز كوشكی ديركووه‌ندل له ئه‌شره‌ت كوشكی بويه‌سه ناودارترين قويخای ئه‌و هووزه و له چه‌م گه‌راو و ده‌ورگردی ده‌سڵاتدار بويه.
ئدريس محه‌مه‌د
ج . أ
