گڕه‌ى سه‌ر گونا
باند بویه‌سه‌و خوار، خوارد بویه‌سه‌و بان
یه كام نه‌هاته له تو دایه‌سه‌ى؟
كام ده‌فته‌ر نویسه راد نویسایه‌سه‌ى؟
ها كوو باڵاگه‌د جوى خه‌یزران بوى؟
ئه‌را سس بویده، ره‌نگ نه‌ماس له ڕوى؟
ها كوو قه‌ومه‌یل ده‌س چه‌پ و ڕاسد؟
حه‌یفه شێوانن كرده‌وه‌ى خاسد
كرده‌وه‌ى كییه چوینه پید كردن؟
خوه‌شى و خوه‌شحاڵید ئه‌را لید بردن؟
ها كوو گڕه‌گه‌ى سه‌ر هه‌ردو گوناد؟
خودا نه‌كه‌یگن كه‌س جوى تو پى باد
خوه‌زگه و باس بكه‌ى، كرده‌وه‌ى كییه
یه كرده‌وه‌ى خوه‌مه؛ كرده‌ى كه‌س نییه
وتم هه‌ى قه‌ومه‌یل بارم گرانه
ئاو له‌ده‌م تاڵه خواردنم ژانه
یه كه‌ى گوزرانه من گوزرانى كه‌م؟!
من ناشوكر نیم نیه‌زانم چه بكه‌م؟!
مه‌ردم سه‌برى توایگ، من چڕم دووان
دوعاى خه‌یر خوه‌نم، وه ده‌م و وه‌زووان
سه‌برى را دڵ توام خه‌فه‌ت دى نه‌خوه‌ى
سه‌بریگ ئه‌را چه‌و ئه‌سر گله‌و به‌ى
شه‌رته هه‌ر بویشم خودایا شوكر
نه‌وگه تویشمه‌و وه‌ى له‌یه به‌تر
