گووشخاره
مه‌یلم دى نه‌ما ئه‌و باوگه زوى مرد
سه‌ده‌ها فه‌رسه‌ق له تووه‌و دویرم
****
ئمڕوو جوى ئه‌وسا هویرم نیه لاد
گووش دیامه ده‌نگ خشه‌ى نه‌رم پاد
جارى تره‌ك نه‌ویشى تو دڵبه‌رمى
هه‌ر ئه‌و دڵه‌سه ئه‌وسا شكیا لاد
****
مه‌ردم چوو زانن چه ئه‌راد كردیام؟
عه‌سر بان گوناد وه لیو راد سریام
ته‌نگد بویاتا بویمه خوه‌شى راد
ئه‌ساره‌ى ئاسمان ئه‌راد هاوردیام
****
بویمه عه‌تره گوڵ بووم كردییاى
دڵ راد خستیامه‌و پاڵه‌وبانى نیاى
چه بكه‌مه‌و یاد چه له هویر بووه‌م
گه‌ن مه‌ردم سه‌نیاى خاس من فروشیاى
****
بویمه بوڵبوڵ راد وه قه‌ى داره‌وه
ئاوازد چڕیام شار وه شاره‌وه
نان و نمه‌كم له‌وه‌ر چه‌ود نه‌وى
ڕازم نایده ده‌م سه‌گه‌یل هاره‌وه
****
یه ده‌رد تنه من چه‌لى بویشم
له كرده‌ویلد ئیسه‌یش بى هووشم
دڵم شكانى پا وڵاى كردى
غه‌درد گووشخاره‌س یه‌سه هاگووشم
****
هویره‌و نه‌كه‌یدن ڕووژى بوینمه‌د
هه‌راجد بكه‌ن دى نیه‌سینمه‌د
هیمانى شوین تیرد ها سینه‌م
یه‌ك پارچه مه‌كرى غه‌در ها سینه‌د
