کورپه‌ێ که‌پر کورد
له‌ی تاریکه شه‌و ته‌ڵخ زمسانه، ئه‌ر خوه‌ر نادیاره دڵنیابن، ئومێد وه هاتن مانگه‌شه‌و هه‌س هه‌مراێ
ئه‌گه‌ر ئاو نیه نه‌ترسین، ئه‌ی یاران هاوسه‌فه‌ر ده‌لیاێک دڵ، چه‌و ته‌ڕ و بێ خه‌و هه‌س هه‌مراێ
له بی نانی په‌ریشانی، قه‌ێوه‌ن قاره‌مانی جه‌ڕ ده له‌ی خاک پڕ خه‌ێره، خه‌زانه‌ێ خه‌سره‌و هه‌س هه‌مراێ
راسه چه‌م پڕ چه‌قه‌ڵه و چمانێک چه‌مه‌ری ژه‌نن هه‌ڵو به‌رزتره له قه‌ندیل و قاسپه‌ێ که‌و هه‌س هه‌مرای
ئه‌ی ڕه‌قیب، دڵخوه‌ش نه‌که‌ی، ئی خاکه وه چووڵ بزانی ئبنول‌ئه‌جه‌م مرادی و پیروز ئه‌بوله‌وله‌و هه‌س هه‌مرای
زڕان زه‌نگ زه‌واڵ زاڵم، زیڕه و زاێڵه‌‌ێ زه‌رب زه‌مانه خاک بریاس و خوین ڕشیاس، کووچ ڕه‌و ڕه‌و هه‌س هه‌مرای
ڕاسه بڕێک ته‌سلیمن و بڕێک ترسنوک، به‌ڵام ئه‌ی دژمن واده‌مان سه‌ربه‌ن بنار، بزان خاون مه‌تڵه‌و هه‌س هه‌مراێ
کورپه‌که‌‌ێ که‌پر کورد هه‌ڵساس، تیروه‌ن مناڵی فڕداس له پشت قه‌راوڵ حه‌ق، یه گڕه‌ێ چه‌و هه‌س هه‌مراێ
