چوین له دڵد هات سه‌ردانم نه‌كه‌ید..؟!
ك وه ڕه‌د دڵمان نیه؛ وه تاكمه جاریگ وه كاممانه وه‌لی له هه‌ر دو حاڵه‌ت ژیان وه تیه‌ڵ و شیرینی وه سه‌ر ئه‌چێ ، تا تیه‌ڵی نه‌ود تام خوه‌ش شیرینی له‌زه‌ت به‌شه‌و ناكاد.
هه‌و جووره ك جوانی وه گشت ته‌و و تاوی چالاكی و هێزی و نه‌رمی بار سه‌فه‌ر به‌سێد وه‌ره‌و دیار شه‌كه‌تی و بی نا‌زی و ئارامی چوود تا له هه‌رچی هیس و بیس ڕووژ‌گار‌ه سه‌رفه‌راز بوود.
ئی بار شه‌كه‌ته كه‌ی وه سه‌ر مه‌نزڵ ئومید ئه‌ڕه‌سێد و پشته‌ی قورس نه‌هامه‌تی و گرژی ڕووژگار داوه‌زنیدو وه كورته وچانیگ باڵ چه‌و له بان ئاواته‌یلی ئه‌ڵگرید. دید و باوه‌ڕی ئالشت ئه‌كا و نووڕستنیگ نوو وه شه‌فه‌ق ژیان ئه‌ێاد و له تاوانباری زمانه ئه‌وسیدو تا وه‌بار سووك وه ڕییه‌و بچوود .
ئیمنه‌ی به‌شه‌ر هه‌ر تاویگ كه‌م بیه‌ریمن و سه‌رگردان بویمن له هویر و هه‌س و ئحساس و سه‌روه‌ت و سامان !! دیواریگ كۆڵتر له زه‌مانه‌و ڕووژگار به‌دبه‌خت و به‌سه‌زوان ناینیمنه‌وه ك گشت تاوانه‌یل باری بكه‌یمن و زویخی سه‌گینتر و ده‌ردی كاریتر.
یه‌دی ئاخر بیدادی وبی ئ‌نسافی و حه‌ق كوشیه ؛ له‌ی دونیا ك ده‌نگ و هاوار حه‌ق سه‌نین وه‌ره‌و ئاسمان چویه‌و له ناونی هاژه هاژه‌ی ده‌نگه‌یل ، نزه‌ی بی گیان ناسنامه و هوویه‌ت زوان داڵگی باوان ڕمیاگ و له بیر بریاگ وه گووش ڕه‌سێ ك بی ناز و بی خاون چه‌وه‌ڕی ده‌س ناز كیشیگ ئه‌كا ك له بیكه‌سی و قه‌ریبی و بی خاونی نجاتی بیاد...!
ساڵه‌یل فریه‌یگه تامازروودم ، چراخ ماڵ و دڵم كووره؛ ڕی گومه‌و كردمه‌و ویلانم ، نازانم وه كیم ڕیه‌و بچم تا وه‌ماڵ بڕه‌سم ! هه‌رچی منه‌د ئه‌كردم دیار نه‌بید ؛ چوین له دڵد هات سه‌ردانم نه‌كه‌یدو له‌بیر بوه‌یده‌م؟!
من حه‌ق وه‌ملد دیرم میرات باوگ و باپیردم و باید پشت وه پشت له ناو دڵ و زوان و هویردان جیمه‌و بكه‌ن ! شاڕه‌گ ژیان و مایه‌ی فه‌خر و شانازییدانم ؛ ده‌نگ و ڕه‌نگ ڕه‌گه‌ز و تیره‌و تایفه‌و تاریخدان وه منه‌و ناسن و فه‌ناو نابوودیم ، ئیوه تویش مه‌رگ كوتوپڕیگ ئه‌كا ك هویچ ده‌رمانیگ ئه‌رای نیه...
