چه‌وه‌ڕی راده‌ داڵاهوو

چه‌وه‌ڕێ ڕاده‌ داڵاهوو

ت ده‌رد بێ ده‌رمانمی

هه‌م مه‌ڵهه‌می هه‌م ژانمی

سووماێ چه‌وه‌یله‌گانمی

چه‌وه‌ڕی ڕاده‌ داڵاهوو

ساز ده‌سم حه‌ێرانده‌

جه‌سه‌م به‌ن به‌ن وێرانده

دیده‌م، واده‌ێ سێرانده

چه‌وه‌ڕی راده‌ داڵاهوو

له‌ هجراند به‌نه‌یل بان

له‌ لیم سووز سه‌رته‌ز توان

ڕێوار ڕییه‌گه‌ێ که‌شکه‌شان

چه‌وه‌ڕی ڕاده‌ داڵاهوو

په‌پوو خوه‌ش جه‌مال هاته‌وه‌

شه‌یدا و سووک باڵ هاته‌وه‌

ڕه‌نگین و پڕ خاڵ هاته‌وه‌

چه‌وه‌ڕی ڕاده‌ داڵاهوو

کويه‌یل کیشانه تووڕ که‌و

چه‌قی چه‌قاڵه‌ێ چه‌و له‌ خه‌و

نه‌رگس سويه‌رمێ دایه‌ له‌ چه‌و

چه‌وه‌ڕی ڕاده‌ داڵاهوو

که‌ێکوو چه‌نی نه‌خش ها چووێ!

شه‌وبوو چه‌نێ خوه‌شه بووێ!

له‌ولاو چه‌نێ ته‌رکه‌ لووێ!

چه‌وه‌ڕێ ڕاده‌ داڵاهوو

شنه‌ێ واێ شه‌مال هاته‌وه‌

شوان وه‌ شمشاڵ هاته‌وه‌

کووچ کورده‌ماڵ هاته‌وه‌

چه‌وه‌ڕێ ڕاده داڵاهوو