چن دوبه‌يتييگ له ره‌زا جه‌مشيدی
شه‌واره هه‌م شه‌واره هه‌م شه‌واره
چه‌وه‌يلم بی خه‌وه‌و بينه دواره
مِ هه‌ر چی كه‌م رويد نايده‌و خياڵم
وه ناو هه‌رچی هه‌ساره‌‌يله دياره
**************
بنووڕه ته‌مته‌مه‌لويلان چه كه‌يدِن
بنووڕ چوی داره‌گانيش هه‌لكه‌نيدِن
ئه‌زيزم هاله رێ ديری تيه‌يده‌و
خوداگه ياره‌گه‌م وه پا نه‌خه‌يدِن
وه ناو سه‌وزی وه‌هاران هه‌ر تو سه‌وزی
منيده شه‌مع هه‌ميشه پڕ له ئه‌سری
وه‌لی هه‌ر كه‌س نه‌زانيدِن مِ زانم
تو ليمو زه‌رده‌گه‌ی باخه‌يل قه‌سری
**************
ئه‌لا يا ايها الخاون دو چه‌و كاڵ
ته‌مام ده‌مچه‌ود پڕ له خه‌ت و خاڵ
توام تا ئاسماند په‌ڕ بكيشم
مه‌گه‌ر خوه‌د به‌يده پيم قه‌يری په‌ڕ و باڵ
**************
ئه‌ڵاجه‌ويمه ئه‌را شه‌و رووشنايه
چمانی خوه‌ر وه تاريكی هه‌لايه
كه‌ميگ نووڕستمه‌و ئيلام و ئه‌ولام
چه ديم ئه‌و نازه‌نينه‌سه وسايه
**************
چه‌وم په‌ڵپد گريدن هايده كووره
بنووڕ زه‌نگم زڕيدن هايده كووره
دڵم دی ده‌رقه‌یِ دويريت نيه‌تيدن
ئه‌راد ديری مريدن هايده كووره
چه‌وه‌يلد هه‌ی چه‌وه‌يلد هه‌ی چه‌وه‌يلد
سيه و بور و كه‌و و هويلن مويه‌يلد
يه هه ر ئويشن وه كی كه‌يد ئی فريشته
جه‌نگه لای مه‌مووه‌يل و خاڵوه‌يلد
**************
ده‌نگيگ هات و ده‌نگيگ هات و ده‌نگيگ هات
دڵم كه‌فته‌و رپه هه‌ر وه سه‌ر سات
وه شوون هه‌ر ده‌نگيگ هه‌ر هاتم و چيم
وه‌لی ئه‌و نازه‌نينه ده‌نگ وه‌لی نات
خه‌ويگ ديم و خه‌ويگ ديم و خه‌ويگ ديم
وه ناوِ ئه‌و خه‌وه تا ئاسمان چيم
وه‌تم بيجگه خدا كه‌س نيه‌يْوْنمه‌و چه‌و
چه ديم ئه‌و نازه‌نينه سيفی دا پيم
**************
تو جوورِ قرمزی ميوه‌ی هه‌ناری
تو سه‌ولِ به‌رزِ باوه يادگاری
منيشْ دروزِنِ ده‌م مه‌ردمه‌يلم
وه‌لا ئويشن تو داوو كه‌و سواری
تفه ئه‌و رووژه له داڵگ پيا بيم
ئه‌رای ئشقد هه‌ميشه هه‌ر گيا بيم
وه ئه‌و رووژه سيه‌گه، كووس من كه‌فت
كِ سه‌ر هه‌ڵگردم و له ليد جيا بيم
**************
زقوم هاله قه‌لاگوشان زمسان
پڕ بخچه‌ی ته‌مه و ته‌مته‌مه لويلان
ته‌مام سه‌وزی ئی ده‌يْشته لاورد
كِ نيشانيگ نه‌مينی له وه هاران
