نیەزانم

نیەزانم یە وارانە ک وەبان شێروانی ماڵە بۊچگڵانەگەێ م وارێد

یاگەر دڵ شاعێری منە؟

یا دەسەیل خەمین منە

ک هۊرەوەرییەیل بێئوودەێ ژیان، لاپەڕە دەن؟

هۊچ کارەساتێگ ڕووژەیل لووژەکەرم ئەو جووش نیەتیەرێد،

هۊر مناڵییەیلم

هۊر ئەلفباێگ ک ئامێتەێ بوو ژیان بۊ

هۊر لێوەخەنەیلد

چەمەدانەگەم خەێدەو ڕپەڕپ

نیەزانم ئەو دڵ بۊچگمە لەلاێ کام شوونپاێ مەلۊچگ

و لەژێر کام دار، نامەسە چاڵ؟

وایل، وەرەو هەر لاێگ چنگیڕ خەن ئەو گیسەیل شەکەتم!

ئەێ کۊچەیل خەرگین دۊکە!

ئەێ باخەیل چەتۊن گیەلاس!

بزەخەنێیەیل م، تیەرینەو هۊر؟

م گوڵەیل واران‌لێداێ ئێ ژیان زامخواردێیەمە

شەکەتم لە پێنۊسەیلێ ک وەتەنیا

قسەیل دڵم لەڕۊ قاقەز بێگیانێگ نۊسن

بیلنا خوڵەکوان ئێ ڕووح زامدارمە

وە دەس ئیوە بسپارم!

 شەهین رزایی سەومار

هەڵگەردان: ژیوا