نازار ئاسمان كه‌و
ده‌ردد وه‌گيان مانگ و خوه‌ر، يه‌ی ڕووژ نه‌چيدن بی خه‌وه‌ر
هه‌رچی توای وه‌بان سه‌ر، هه‌رچی توای وه‌بان چه‌و
ماڵ تۆ ها له ئاسمان، ئه‌ولا تره‌ك وه كه‌شكه‌شان
بويشه خودا بيليده‌مان، وه سای چه‌وه‌يل كاڵده‌و
هه‌م پرشه پرش نويرده، له خوه‌ر شنه‌فتم سويرده
تۆ بويش كی پاخه‌سويرده، تا گه‌ر قژی بكه‌نمه‌و
تا له‌ی هه‌نازه تيه‌يده‌بان، خوه‌ر ڕه‌سێده ئاسمان
مانگ و خوه‌ر و هه‌ساره‌گان، چن تا خوه‌يان بشارنه‌و
سه‌رگۆڵ دار بايه‌می، تۆ نه فره‌يد و نه كه‌می
ئه‌زيزه خاسه‌گه‌ی خوه‌می، چوه بوود ئه‌گه‌ر بوه‌يده‌مه‌و
يه‌ی هه‌مكه گۆڵ ها باوه‌شد، يانه خۆدا دايه به‌شد
قسه‌يل خاس و خوه‌ش خوه‌شد، دوواره چرچگانه‌مه‌و
بيل شان بيه‌م وه شان خوه‌د، بويشيدن ئه‌و زووان خوه‌د
وه‌گيان خوه‌م وه گيان خوه‌د، سفره‌ی دڵم وه‌لاد خه‌مه‌و
سه‌يران سه‌ر سراو تنی، شيرينه‌گه‌ی په‌ڕاو تنی
چه‌و كه‌وه‌گه‌ی زه‌هاو تنی، ئسپه‌ن ئه‌رای باڵاد كه‌مه‌و
هه‌نار خاون كاره‌گه‌م، ئه‌ی سه‌وڵ باوه‌ياره‌گه‌م
داوود كه‌وسواره‌گه‌م، نه‌زريگ بوياتای خوه‌زه‌و
به‌و ئی گۆڵه‌يله وا بكه، وه‌هارێتر وه‌پا بكه
ئی خوه‌ره جاوه‌جا بكه، ڕووژه‌و بكه تيه‌ريكه‌شه‌و
پڕ له خوسه‌يل كه‌و كه‌وم، وينه‌ی سييه‌ڵكی شه‌وم
گلاره ڕاسه‌گه‌ی چه‌وم، كه‌ی دی دوواره‌و تيه‌يدنه‌و
