من دی رۆحیگم بی قه‌رار
میوانم له جه‌م یاران
ئی شه‌وه‌یله پڕن له حه‌کایه‌ت ڕاز نه‌وتریاگ
پرن له زه‌رده‌خه‌نه‌ی شیرین سه‌ر لیو داڵگه‌یلمان
پڕن له موور قه‌ریبی باوگه‌یلمان
پڕن له گه‌مه‌ی مناڵی ڕووژه‌یل ئاواره‌یی
ئه‌و رووژه‌یله ته‌نیا خواردنمان جامێ دو بی و
له‌پی نان ساجی
ئه‌و ڕووژه‌یله
گه‌مه‌کانمان جوور خوه‌مان پاک و
قسه‌یل دڵمان جوور سیپاڵه‌کان وه‌رمان خاکی
ئه‌و ڕووژه‌یله
وه ده‌م نه‌وای شمشاڵ شوانه‌یل،
له وه‌خت شه‌واژوو په‌زه‌گان و
وه‌گه‌رد لیس خوه‌ر شه‌وه‌کیان
له خه‌و هه‌ڵسایم و میگه‌له‌که ساره‌ما کردیم
ئه‌و ڕووژه‌یله
که‌س له ماڵ که‌س میوان نه‌وی
که‌س ده‌ر ماڵه‌گه‌ی خوه‌ی دانه‌خست و
هه‌ر وه ته‌نیا دڵمان به‌س بی ئه‌ڕا زنه‌یی
هه‌ر وه ته‌نیا ده‌سه‌گانمان به‌س بی ئه‌ڕا دوسی
هه‌ر وه ته‌نیا خه‌نینه‌گانمان به‌س بی
ئه‌ڕا ئومید وه ئاینده دویر
ئه‌وسا چشتی شک نه‌وردیم
وه‌لێ هه‌رچی چشته داشتیم
دڵمان خوش بی
ڕویمان ڕاس بی
وه گه‌رد یه‌کا دروو نه‌کردیم
ئه‌وسا وه‌ختای ئه‌ور سیه ئاسمان دڵمان داپوشی
ئیمه گشت مناڵه‌یل ئاوایی وه گه‌رد یه‌کا گورانی
"هه‌یاران مه‌یاران " چڕیمن،
تا واران بواری و گوڵه گه‌نم خوزیه‌گانمان
سه‌وز بود
وه‌ختای گوڵه گه‌نم زه‌رد بی
وه گه‌رد یه‌کا دره‌و کردیم
وه گه‌رد یه‌کا کردیمه ئارد
دایه پیره وه ده‌سه نازاره‌گان خوه‌ی
ئه‌ڕامان کرده‌ی کولیره
گشتمان جوور یه‌ک کولیره خواردیم
ئه‌وسا نه ماڵ داشتیم نه ویلا
ته‌نیا چشتێ ك شک بردیم
قولانجی خاک بی
یه‌ی ده‌وار سیه و
یه‌چکه ئازادی
ئه‌وسا خوه‌شترین سه‌فه‌رمان
ماوای کورده ماڵان بی
وه‌لێ ئیسه
وای له ئیسه............!
ناتوام ئی شه‌ویله بیلم وه جێ
ئاخر من له ناو ئی شه‌وه‌یله
دواره خوه‌م دوینمه‌و
من له ناو ئی شه‌وه‌یله
دواره مناڵ بموه و تیرکه‌مانه‌گه‌م گرمه ده‌س و
چم تا پاساریه‌گان ده‌م وا ڕاو بکه‌م
من له ناو ئی شه‌ویله دواره وه پای په‌تی
که‌فمه شون داڵگم
وه‌ختای کونه‌که‌ی هه‌ڵگرێ و
چوودن ئه‌ڕا سه‌ر کێه‌نی
که‌فمه شوون باوگم
وه‌ختای په‌ڕانه‌گه‌ی هه‌ڵ گرێ و
چوودن ئه‌ڕا شکاره‌وانی
خوه‌شی سه‌فه‌ر من له جه‌م یاران
ها له ناو ئی شه‌وه‌یله
له شوون ئی شه‌وه‌یله
من دی رۆحیگم بی قه‌رار
مه‌لیگم ته‌ڵوه‌نه
له شوون ئی شه‌وه‌یله
که‌س دی وه گه‌رد که‌سا قسه نیه‌که‌ی
له شوون ئه‌ی شه‌وه‌یله
هه‌ر که‌سه چوته‌و زندان ماڵ خوه‌ی
