له هجران کی وه‌ی ته‌ور خه‌مباری
مه‌ر مه‌حره‌م ڕاز کام درده‌داری
له هجران کی وه‌ی ته‌ور خه‌مباری
سینه‌د جای تیشه‌ی کام دڵنه‌وازه
وه جای هه‌ر تیشه‌ش یه‌ی دنیا ڕازه
ڕاز کام ئاشق ها سینه‌ی پاکد
ئاوود چوى زه مزه م کیمیاسه خاکد
وه زاهر بی خه م وه دڵ ناڵانی
فه رسووده و زام ئه‌قیده‌ی ساڵانی
نیشانه‌ی دێرین تاریخ مادی
راز دار عشق شیرین فه‌رهادی
ئه‌و د ناکامه له باوشد مردن
ڕاز عشقبازی وه ت ِ سپردن
شاهد ڕه‌نجه‌یل فه‌رهاد پاکی
وه زه‌رب تیشه سینه سه‌د چاکی
له‌وح ئفتخار گه‌نجینه ڕازی
ئستوار قامه‌ت سینه فه‌رازی
قه‌رارگای شیرین شه‌و دیز سواری
ماوای عاشقان دڵ بی قه‌راری
جای سیرو شکار نه‌و نه‌هاڵانی
به‌هه‌یشت به‌رین كورده ماڵانی
سینه خراشیای تیشه‌ی فه‌رهادی
ته‌بیعت بۆکر ختته‌ی ئابادی
ئه‌ی قه له سه‌ر به‌رز ئه‌رام عه‌زیزی
جای شیرین فه رهاد خسره‌و په‌رویزی
سه‌راود ئه‌سرین گریانه چه‌ود
وه لای گاماسیاو چوى به‌يده‌و خه‌ود
هیمان تووز خه‌م هابان شاند
هه‌ور دڵته‌نگی وارید له باند
وه‌ی ته‌ور تا وه‌که‌ی خه‌مین بنیشی
په‌ی مه‌رگ یاران هه‌ر ئاخ بکیشی
سه‌ر به‌رز خه‌مین خوه‌م شه‌ریکدم
هاوڕا ز شه‌وه‌یل دڵ خه‌ریکدم
هه‌م ت خه‌مینی هه‌م م خه‌مبارم
ت زه‌خمى تیشه م زه‌خمی یارم
