كه‌رویه‌ى زانا
له جه نگه‌لى له یه‌ى ساڵ
بو وه قوى وقرم و قــــــــــاڵ
جه‌م بوى مه‌ل و موور و مار
فیل و خرس و شه‌ل كه‌متار
داڵ و قڵا و كه‌رویه و خه‌ر
ده‌ى و دام له جــــانه‌وه‌ر
جـار جـارى شاگه‌ردانه
گه‌ورا و بویچگ له‌ى بانه
شیرخوه‌ى كردوه پاتشا
جارى كیشان له هه‌رجا
حوكم حاكم شـــــاشیره
گیشت بژنه‌ون لـــه ئیره
شــــــا فه‌رمایش كردیه
شـــــــاى زینگ و مردیه
هه‌ركه ها له‌ى وڵاته
له‌ى ڕووژه و له‌ى ساته
ڕووژى یه‌كى خــوراكه
ئراى شــاهه‌نشاى پاكه
ئمڕوو خرس و سوو كه‌متار
دسوو كه‌رویه و سێ سوو مار
ڕووژى یه‌كى خـــــوراكه
ئراى شـــــــاهه‌نشاى پاكه
زڵه كه‌فت له‌بان و ژیر
له‌ورسى و هه‌م له تیر
كى وه خوراكى شیربوود؟
شا وه‌ى خوراكه تیر بود؟
شه‌رت كریا وه پشك و تیر
گـــابوور كریا وه زه‌نجیر
چاشتى نه‌ختى نرا شیر
مه‌ریه شاشیر بكه‌ى تیر
ئى جا وه‌راز و كــــه‌متار
سفید به‌ت و سیه مــــار
تیر و پشكى نوو كریا
چایشتى ئرا سوو كریا
كى بوى كى بوى كه‌رویه بوى
چاو كه‌فت له جه‌نگه‌ڵ زویزوى
نه‌وبه وه‌و زانا ڕه‌سى
ئراچاره چه‌و به‌سـى
قویته برد وه فكر و هویر
عومرى كول و ریى دویر
چوى له‌ى داوه ڕزگــــــار بوود
ئاســـــــــووده له ئـــازار بوود
دویر له ئـــــاژاوه‌ى مردن
وه شادى ئه‌و سه‌ربردن
كه‌رویه فـــره بینــــــــا بوى
كتاو خوه‌ن وزانـــــــا بوى
نه‌خشه‌ى ئرا شیــر كیشا
ڕه‌سى وه خزمه‌ت شــا
دولا ڕاسه‌و بوى و وه‌ت:
شاى جه‌نگه‌ڵ وه سڵامه‌ت
وه پشك و تیر و ده‌سخه‌ت
وه م ڕه‌سیـــــه نه‌وبه‌ت
هاتمه وه خزمــــــــه‌تت
تا مل بیـــــه‌م وه په‌تت
بوم وه چایشت و خوراكت
وه نووش گیان پاكت
شیرنووڕس وه شكـــــــارى
دى ك نیه‌تیـــه‌ى وه كارى
كه‌رویه كه‌ى بكه‌ى تیرى؟
كه‌ى بكــه‌ى تیر شیرى؟
كه‌رویه فكر شیــر خوه‌نى
ساز وه هه‌واى تر ژه‌نى
وه‌ت:ئه‌ى شیر دلاوه‌ر
تو ئاغـــــــاى وم نه‌وكه‌ر
له‌ولاى جه‌نگه‌ل یه‌ى شیرى
له چــــــــاڵاوى جى دیرى
داواى پادشـــــــایى كه‌ى
ناو شاشیر وه گه‌ن به‌ى
ترسم بو وه مایه‌ى شه‌ڕ
شیر نیرى پیرى گه‌ڕ
شاشیر له جى ئه‌ڵپه‌ڕى
چل زه‌نجیر له جى بڕى
وه‌ت:هاله كوو ئه‌وشیره
زوى كه بچیم دى دیـــــــره
پى نیشان ده‌م كى شاهه
خنكنمه‌ى له‌و چاهه
پى نیشان ده‌م شا كیـــــه
ئه‌ڵدڕمه‌ى له‌و جیـــــه
شا چى تا سه‌ر چاڵاو
سه‌ر كیشا و نووڕس وه ئاو
شیرى خوران دى وه چه‌و
ڕووژ ڕووشن بوى وه شه‌و
په‌نجه كیشا وه دیوار
خوریشت كرد و وه هاوار
خوه‌ى خسه ناو چاڵاو
په‌ى كوشتن شیر له ئـــاو
شیر نه‌و و شـــا خنكیا
شیشه‌ى عومرى شه‌وشكیا
گیشت خلاس بوین له سته‌م
له ئاژاوه و خوسه و خه‌م
ئـــــــازادى بوى وه خه‌ڵات
ئرا چوار گووشه‌ى وڵات
مه‌ته‌ڵ وه ئاخر ڕه‌سى
قڵا وه ماڵ نه‌ڕه‌سى
وه بان چیمن ماس بوى
ئى مه‌ته ڵه ڕاس بوى
هاتیمه‌و خوار دوو بوى
مه‌ته‌ڵه‌گه دروو بوى
