كزى داڵگم

ئه‌ڕا بى تاقه‌تى له‌وه‌ر چه‌وم
هاوراز ئه‌زیز  وه‌ ڕووژ و  شه‌وم
داڵگه‌ خوڵك خوه‌شید خوه‌شى ژیانمه‌
هونه‌ر پڕ له‌  سووز دڵ و گیانمه‌
داڵگه‌ خوه‌شى تو سه‌ربه‌رزى منه‌
خوه‌شى وشادى من دڵ خوه‌شى تنه‌
داڵگه‌ من نوو مانگ  باڕ گیاند بویم
تاگه‌ر گه‌ورا بویم له‌ داواند بویم
وه‌ شیر پاكد گه‌ورام كردیدن
جه‌ور بى سامان ئه‌ڕام بردیدن
ده‌نگ  لاوه‌ لاوه‌د له‌پاى گاڤاره‌
هیمانى ها گووشم سوو  ئیواره‌
وه‌تید ڕووڵه‌ گیان كوورپه‌ى شیرینم
مایه‌ى شانازى ڕووژگار و ژینم
له‌ هویرم نیه‌چوو چیدن وه‌باوان
گرتیه‌م وه‌كووڵه‌و  وه‌ره‌و سه‌راوان
چوى له‌ هویرمه‌و چوو ئه‌رجیگم ژان كرد
سه‌ر له‌لید شیویا وه‌تى كوڕم مرد
ئیرنگه‌ من پیر بویم هه‌ر ئه‌ڕام ئه‌ڵقرچیه‌ید
بیس و چوار سه‌عات سه‌ده‌قه‌ دانه‌ید
چه‌ ئه‌ڕاد بكه‌م تاخاسید به‌مه‌و ؟
بگرمه‌د ئه‌و كووڵ وه‌ ڕووژ وه‌ شه‌و
گیانم ئه‌ڕا گیاند ئه‌ر بنه‌مه‌ گره‌و
وه‌قه‌وڵ خودا هه‌م حه‌قد نیه‌مه‌و
ئیرنگه‌ دوینمه‌د وه‌ ئه‌ى حاڵه‌ته‌
ئویشید ژیان نیه‌توام یه‌ زه‌ڵاله‌ته‌
له‌لام له‌یهوا نه‌ویش ده‌ردد له‌ گیانم
وه‌بى تو زانید تیه‌ڵه‌ ژیانم
وه‌ختى دوینمه‌د كز و خه‌مبارید
چمان ڕیشگ  دڵم كیشید، درارید
تو هویر و نویر و چراخ ماڵمید
هیز و تواناى ساڵ وه‌ ساڵمید
تو قه‌ڵخانه‌گه‌ى پشت سه‌رمید
تو پژتن پشت و تو هونه‌رمید
به‌هه‌یشت له‌و دونیا هاژیر پاى تن
وه‌ ڕجاى تنه‌و  ره‌حم كه‌ن له‌ من