غەریبم

غەريبيم جوور يە کە له ناو ئى شاره 

را م تيەريکه ڕا ت شه واره

نه دڵ خوەشى هەس نه مانگەشەو هات

نه له لاێ کەسێ کەپوو وه دەو هات  

نه وەهار هاتەو نه دارێ چەقی

نه کيەنی له ساێ دەروەنەیل تەقی 

 تووز خەم هاتەو نيشته رۊ دارەو 

هەساره باڵ گرت له ناو شەوارەو

دۊەتەیل  وه بێ دەنگ وێنەێ دار سزيان 

دارەيل جوور دۊەتەیل وه پاوه ڕزيان 

باخەیل زەردەو بۊن جوور زەردى خەزان 

داخ و زيوخ و زام وەهار داڕزان 

بەن بەن داڕزيان دارەيل وه پاوه 

 کۊە هەم پووس وەهاران  داوه 

نه چۊزە مەن و نه سەوزى دارێ 

نه دەنگ مەلەوەر له ناو شەوارێ

وڵات پڕ له خەم دەرۊن  پڕ له زام

 نەێ زار خەمين و دڵ خوەشى ناکام 

خەیاڵ تەرف تۊن چەرداخەیل ڕميان 

داوڵەیل خەم بار وه پاوه شکيان 

هەر کام ڕا يەێ جى باڵەو گرتيمن 

بارکووڵەێ تەنياێ وەلا برديمن 

لانه ويزيمن هەم ڕووژ و هەم شەو

له دەس جەفاێ ئاسمان کەو

غەريبى هات و نيشته شانمان 

بڵووزەێ تەنیاێ وەر دا گيانمان 

وڕینە کەفته شوون ماڵمان 

دڵتەنگی هەر شەو ها خەياڵمان

يەسه دى ئيمه يەک نيەناسيمن 

له زار و له زەۊگشتى ئاسيمن 

گشتى مرديمه وه سەر پاوه 

له وێنەێ داۆڵ وه دەم واوه

ژيان بۊ وه ژان خەنێ گرانه

تام زندگی تام سنانە

جەلال کووهی