شيعريگ له سه‌يد يونس هاشمى
م دووسد دێرم
ئه‌وقره‌گ تیر که‌مان ئاره‌ش بچوود
چه‌نه زوور بازو رووسه‌م
چه‌نه پاکی خۆن سیاوه‌خش
شایه‌دی فێشتر....
م دووسد دێرم
چه‌نه گڕه‌ی دڵ داڵگ ئه‌را کوورپه
چه‌نه سه‌رسختی باوگ
قه‌د ته‌ره‌ک ته‌ره‌که‌یل بان پووس ده‌سئ
شایه‌دی فێشتر....
م دووسد دێرم
چه‌نه تامازروو بۆن مناڵ ئه‌را ئه‌سپاو بازی
ئه وه‌یلکان و تاوه‌تاوه
تا ئاخرین شوماره گ زانی
هه‌فت گله نوو گله
شایه‌دی فێشتر....
م دووسد دێرم
چه‌نه زکره‌یلئ گ داپیرم هه‌ر رووژ خوه‌نئ
چه‌نه حرمه‌ت باپیرم
وه ئه‌نازه‌ئ دڵپاکیی مه‌ردم ئه‌وسا
شایه‌دی فێشتر....
م دووسد دێرم
چه‌نه وه‌هار و خۆنچه‌ئ په‌لپووی داره‌یل
قه‌د هڵم گه‌رمائ تاوسان
چه‌نه زوور وائ پاییز و سه‌ردی زمسان
شایه‌دی فێشتر....
م دووسد دێرم
چه‌نه قوڵپه قوڵپ ئاو کیه‌نیی وه‌ر ماڵه‌یل
چه‌نه هونکی ئاو کونه
جوور ده‌ڵنشینیی ساروکی کووڵا
شایه‌دی فێشتر.....
م دووسد دێرم
چه‌نه بێقه‌راری ئاێم چه‌وه رێ
چه‌نه هۆرد بۆن ئاێم دڵشکیا
قه‌د سه‌ختیی دڵکه‌نین و دڵ بڕین
شایه‌دی فێشتر....
م دووسد دێرم
تا ۆه‌ور تا ئاسمان
تا ئه‌وره گ نه که‌سێ دییه نه شنه‌فتێیه
تا هه‌ناز خودا
شایه‌دی فێشتر.....
م دووسد دێرم
م دووسد دێرم
سید یونس هاشمی
