شه‌واره
دڵ من بایه‌قوش پیره‌ن نه‌مه‌ن تاقه‌ت ئاواز خوه‌نینم
ماڵ و ماوام که‌لاوه‌ی ده‌رده‌ن هه‌ر وه ئی هه‌واره‌وه
کوڵه‌ی دڵم تێ جوور کیشکچی قه‌ڵای ئاگرداران
وه‌شت واران شه‌وه، تینگ زوڵفه‌یل ته‌ڕم دڵ وه خوماره‌وه
شه‌وه و کاروان عشقت گوم کردمه، ڕێ هه‌وارت نیه‌زانم
بوو میخه‌ک یه‌قه‌‌ت ناتێ وه ده‌م شنه‌ی شه‌ماڵه‌وه
من جوور دار پۆتار سه‌ر ئاسوو ته‌ریک مه‌نمه
له وێنه‌ی وه‌هار سه‌وز میلکان مژده‌ی وارانێ باره‌وه
له‌ی ته‌مته‌مه‌لویلان عشقه شه‌وگیر و دڵگیر تۆ بیمه
که‌ڵ دیده مه‌س په‌ڕاوی، شێوه‌ی شیرینت ها نساره‌وه
دڵ که‌فتیه‌سه دام که‌مه‌ندت خه‌ڕگم خه‌سه، تۆ نیه‌زانی
گه‌رده‌نت هه‌ڵاڵه، باڵات سنه‌وبه‌ر وه سه‌مه‌ر هه‌ناره‌وه
من چه توام له تماشای ڕننه‌ی واران ناو ده‌روه‌نه‌یل
ئاهۆ خه‌یاڵم هه‌ر خوه‌تی وه‌ی ده‌نگ باره‌ی باره‌وه
ڕێوار ڕێ سیه ده‌وار زوڵفتم، چه‌ویلت هه‌ساره‌ی شه‌و
باز به‌ێانی، به‌ڕه‌زای شاخی، وه ده‌م سروه‌ی وه‌هاره‌وه
ڕیشه‌ی جه‌رگم وه تیر ئه‌بروه‌گانت غاره‌ت بکه‌ی، بێباکم
سفره‌ی دڵم له خاک فه‌رهاد عاشق داخستمه، له‌و کناره‌وه
