شاره‌گه‌ى خوه‌م
له هویره‌و نه‌چیده شیرین شاره‌گه‌م
په‌رده‌ى خه‌م لاده ئه‌ى گلاره‌گه‌م
ئه‌سره‌گه‌د بسڕ ئه‌ى نازاره‌گه‌م
ئه‌وه سه ڕزگارید و دراتید له خه‌م
ئه‌وه چه‌ن ساڵه داگیر كریاویدن
وه ناحه‌ق له كورد دویره‌و خریاویدن
دژمن ڕوى سیه بوى هویچ پى نه‌كریا
به‌رگ ئازادى ڕه‌ین ئه‌ڕاد دویریا
ئه‌وسه مه‌رجه‌گه‌م هاوردم وه‌جى
موباره‌كت بوو به‌رگ ئازادى
سه‌رم سڕمینى من وه بازى كه‌س
تواى مه‌نه‌لى بووگه هن ناكه‌س
هه‌ركه‌س شار خوه‌ى تواى بفرووشى
زه‌نگ بى غیره‌تى زڕیاس له‌گووشى
هه‌ر كه‌س هه‌وڵ نه‌یگن ڕا نیشتمانى
سه‌ر شووڕ ژیه‌یگن وه‌په‌شیمانى
بیلا ڕوى ڕه‌ش بوون گشت دوژمنه‌گان
هه‌ر هه‌ى وه‌ى بكه‌ن لاڵ بوون له زووان
سلێمانى و هه‌ولێر تاچووگه زاخو
ئویشن مه‌نه‌لى بڕازنن له نوو
ئاوه‌دانى كه‌ن وه ته‌ور جوانى
ئه‌ڕا خه‌ڵكه‌گه‌ى وه شادمانى
تاكوو بى خه‌م بوون له ئى ژیانه
له ئه‌مڕوو ئه‌و دویا هن كوردستانه
له سایه‌ى خودا پارتى و بارزانى
كورد و كوردزاده‌ى له كوردستانى
