سه‌وه‌ته‌ێ پڕ له پرسه و سویر
بازه‌کان
دڵیان قرمز له واران
و سینه‌یان ئاگردان سه‌ر که‌ڵاوان
باڵوه‌شان تا که‌شکه‌شان
قه‌تره، قه‌تره وه‌فر تا سفیدی زه‌مان
ده‌مه‌ته‌قه‌ی قه‌ور سه‌رد دوژمنان
تو هه‌ڵفڕین و باڵوه‌شان
تو پادشای سه‌رسواران
له چه‌و تو سێ خاڵ گونای خاڵخاسان
زاگروس، بیستووین، تاقوه‌سان
چه‌وه‌کانت له خوه‌ره‌زه‌رد ئیواره
ده‌روه‌چێ له باشوور، ده‌روه‌چێ له رووژهه‌ڵات
دوزه‌خ له لێوار قه‌ور ڕووژئاوا
دوزه‌خ له میل سوقانم لوویرنێد
من و تو
له ده‌یشت خه‌یاڵ ته‌م و مژ زه‌مان
وه‌شانن توم که‌له‌مه و
ده‌سبازی وه‌ل قه‌ڵه‌م
ره‌شکه‌یل پڕ له خه‌رمان زیاێ
زیاتر له یه ده‌هه ده‌مه‌ته‌قه‌ی من و تو
کورپه‌ی شێرمان خه‌ریک جه‌شن دوانزه ساڵانه
به‌و تا نه‌ویشیم
بیستووین خه‌و نیه‌که‌ید له ده‌نگ تێشه‌ی فه‌رهاد
وه نه‌ویشیم
خه‌وه‌ر سڵامه‌تی مه‌جنوون له ره‌سانه‌یل په‌خش بی
به‌و تا خه‌ت بکیشیمه بان چه‌مه‌دان جیایی و
شێر بوویشیم
ئه‌ڕا دار، وه‌خت سیپاڵ ئاڵشت کردن
عه‌ینه‌ک چه‌و فڕ ده‌یمه پشت بیستووین
تو
وه سه‌وه‌ته‌ی پڕ له سوویر
فه‌رهاد ئاسا
خوه‌ت بیه ده‌س هوویر شیرین
منیش
وه سه‌وه‌ته‌ی پڕ له پرسه
له به‌رزایی دار سه‌وڵ شه‌که‌ت
له ژێر نه‌خشه‌ێ ده‌وار ئاوایی
مه‌سیی شه‌راو به‌سمه کیسه‌ی ته‌ماکو چوڵ و
که‌وشه‌کانم ده‌مه ده‌س فاڵی له حافز
پێشکه‌ش وه هاوڕێ دڵسووز و قه‌یرزان "سارو خوسره‌وی"
