زولفت وه باڵشتم بکه‌ی
هامه ته‌ما ئمشه‌و ده‌نو ، ئه‌زره‌تمه‌ن گشتم بکه‌ی
نوقل ده‌مت تام ده‌مم ، زولفت وه بالشتم بکه‌ی
ئمشه‌و بێلا خوه‌م خوه‌م بووم ، ئه‌ر فریه‌م و ئه‌ر که‌م ، بووم
سو شه‌وه‌کی مێل تونه ، وه هه‌رچگ ئالشتم بکه‌ی
ئمشه‌و م دار ئه‌زره‌تم ، پرچ و پیه‌ک و هشک و لوه‌تم
دی ئه‌و ده‌س خوه‌ت که‌فتگه ، ئه‌لرازنی ، زشتم بکه‌ی
ئه‌ر نیشتیه دومه خڕت ، ئه‌ر کووچ که‌ی بار ئه‌لگرت
هه‌م دلمه کلاو وه سه‌ر ، وه داول کشتم بکه‌ی
خه‌رمان تو خه‌ێره ده بن ، دامان م پويک په‌تی
خه‌ێر و سواوه وه خودا ، ئه‌ر ده‌ێ پر مشتم بکه‌ی
مێل تونه و شوکر منه ، نوير تونه و دیشت منه
یا چوێ نسار یه‌خ به‌ن ، یا گه‌ر ک خوه‌ر وه‌ێشتم بکه‌ی
مێل تو هرچگ ک هه‌سه ، مێل منه ، دی هه‌وه‌سه
زێف نیه‌وم ، ژار نیه‌وم ، تلا بووم ئه‌ر خشتم بکه‌ی
یانه ورینه‌ێ توو ته‌ون ، گلیه‌ی ئازای شه‌ون
سوو نای ئه‌را بان سه‌رم ،مێه‌نم ده کول چشتم بکه‌ی
فه‌رهاێ ئه‌گه‌ر کوه که‌نی ، شرین قه‌له‌م دا وه ده‌س
مه‌ر بو وه خولک تیه‌ل تو هه‌م کوه که‌ن مانشتم بکه‌ی
نورمراد ره‌زایی
