یەی روو تو ژەم دۊرەو نەکەف

یەی روو تو ژەم دۊرەو نەکەف، هەرچگ خەمە بارم نەکە

یەی شەو هەم ئەڵ شانم نەخەف، ئێقەیشە نازارم نەکە

هەێ هەێ بکەو سازت بژەن، م وەرکێگم ویرت وەمەو

ڕا م نەخوەن، ڕا م نەخەن،م گورگێگم هارم نەکە

ئەو شەو شەماڵەێ زڵفەگەت ناڵ چناوەم کردگە

باڵ بژانگت ئەڵ بگر، کی وت کە بزمارم نەکە؟

ئەر گیست ئمشەو شیفتە بوو، هەم دیتەمە واڵا ژەنوو

ئەر ئەو چنی گیست چوە دوو؟ خوو بێ پەلامارم نەکە

هشکە تەلم یان توک پەلم، بشکن کە دارم ئەڵ بچووگ

تێشنگ نەنە دە ڕیشگم، ئێجوورە پاسارم نەکە

چۊ سا دە شوونت کەفتمە، هەرکوو بچی هام ئەو نووات

تا کەێ خڕم دی ئاسمان! ئێ شار و ئوو شارم نەکە

ژە چنگ تو م دەر نیەچم، ژە مڵک تو ئەو دەر نیەچم

ئێ سەر تونی ئەو سەر تونی، دیەر بێ خودی بارم نەکە

جارێ تۊەم دووسی خەری، جارێ تۊەم خۊنی گەری

ساڵێ بخەو ساڵێ بێلەم، م خاکتم ژارم نەکە

ژە دەر چگی ژە دڵ مەچوو، وە ڕێ چگی وە گڵ مەچوو

هەێ گوڵ مەچوو  بڵبڵ مەچوو، چۊ سەردووا زارم نەکە

هەێ خەم ژە نامەو خوەیتەمان، ژە گیان و دڵ ئەو کەیتەمان

وە وای تونیگ وەیتەمان، بەو پۊک پیتارم نەکە

فه‌رهاد شاهمورادیان