ده‌رد غه‌ریبى
خه‌رمان عومرم منیش دام وه با
دویره‌و كه‌فتمه له قه‌وم و برا
ئه‌یه چه‌ن ساڵه وه‌ل ژیانا
خورج غه‌ریبى خسمه وه‌شانا
كڵاشم چه‌كه‌و دڵنگم دڕیاگه
هه‌زره‌ت ئاواى له‌دڵم هه ماگه
داخ غه‌ریبى یه‌سه پیرم كرد
له‌قه‌وم وله‌دووس گشت دڵگیرم كرد
ده‌رد غه‌ریبى گران ده‌ردیگه
جووڕ ماڵ گه‌ورا و كوانگ سه‌ردیگه
وه‌ختى فكره‌و كه‌م له وه‌ته‌ن دویرم
داخ غه‌ریبى نیه‌چوو له هویرم
ئه‌وسا باركریام جارى مناڵویم
ده‌ور چوارده‌ساڵان یا پانزه‌ساڵۆیم
دى له ئه‌وساوه دڵم زامداره
وه‌ل مه‌ینه‌تا ژیه‌م له‌ى شاره
سه‌ر نه‌چه‌مانم ڕووژى ئه‌را كه‌س
ناسنامه‌گه‌میش مه‌ردم زانى چه‌س
له‌ڕى ڕه‌سه‌ن باوگ و باپیرم
یه‌و ڕووژ ده‌رنه‌چگم هه‌رچه‌ن فه‌قیرم
بایه‌ت بزانم ڕا بارمان كردن
زه‌وى و باخه‌مان ڕا وه‌زوور بردن ؟
له هویرم نیه‌چو ئه‌و ڕووژ باره
زیڕه‌ى مناڵ هات له‌ناو گاڤاره
ده‌نگ ڕووڵه‌ڕوڵه‌ى ژنه‌یل خوه‌مان
له‌گووشم ده‌نگیان ده‌نگده‌یگه‌و هیمان
گیرى داڵگم لاوانه‌و وه‌شه‌و
سه‌نگ وه‌سه‌ختى خوه‌ى جوور ئاو تیوانه‌و
هاوار باوگم وكه‌پووڵ كوتانى
ئه‌را ڕیه‌ن وماڵ وئه‌را دیواخانى
چوى له‌هویرم چوو ئه‌و كارساته
په‌سا ده‌نگ ده‌یگه‌و له‌ى ڕوى بساته
هه‌رچه‌ن هاوار كه‌م چوینه ناچارم
كه‌س گووش نیه‌یگنه ده‌نگ هاوارم
هه‌ر چه‌ن هاوار كه‌م ده‌نگم نیه‌ژوه‌نن
هاناى سه‌د هاناى وه‌قسیه‌م خه‌نن
ئایم له‌بان سێ چشت كوشیه‌یگه‌ن
دین وشه‌ره‌ف و زه‌وى بڕیه‌یگن
ئمجا چه‌بكه‌م چه‌چوو له وه‌رم
له‌ى خه‌رگ دونیا بگرن له‌سه‌رم
