خه‌م من
منم وه یه‌كى قه‌یزم له‌وه‌ر چه‌و
نه ڕووژم ڕووژه نه شه‌وم جوور شه‌و
له چوار چه‌پ و ڕاس نه‌هات وسیاگه
زه‌نگ بێ كه‌سیم، برایل، زڕیاگه
بار و بارخانه‌م لێم ئه‌ڵكنیاگه
مایه و سه‌رمایه‌م گشتى خوریاگه
هه‌ى داد هه‌ى بى داد یاران بى كه‌سم
كه‌س خه‌وه‌ر نه‌یرى له خه‌رگ خه‌سم
ده‌رد بى براى دیار لیم داگه
دڵ خڵاس كردگه قه‌واخم ماگه
ده‌رد بى كه‌سیم دیاره له خوه‌م
خودا پیم زانى و داڵگم و ژنه‌م
بى كه‌س ڕا چوینه بى كه‌س دیاره
باوگ و برا نه‌یریگ و له مه‌ردم تاره
بى كه‌سیش هه‌سه كه‌مى نه‌داره
له‌لاى قه‌وم و دووس هه‌ر بارى لاره
دڵسووزى نه‌یرم دڵ سووز نه‌ماگه
بویشیگن چه‌ده چه‌لید قومیاگه
ده‌ردم گرانه تیماركه‌ر كیه
نه باوگ نه برا له ده‌ورم نیه
هه‌رچگ سه‌ر خڕ ده‌م له چوار ده‌ور خوه‌م
یه‌ك كه‌سى نه‌یرم داد ئه‌وپى بووه‌م
بیلا بنیشم ئه‌را خوه‌م بگیرم
كه‌سى چووزانى چ ده‌ردى دیرم
ده‌رد من دایم هه بى ده‌رمانه
لوقمان حه‌كیم لێ سه‌رگه‌ردانه
له سه‌ر تا وه‌پا ته‌مام سوزیامه
جه‌سه و ده‌روینم گشت له بن زامه
ئه‌ر حه‌كیم تیمار جه‌سه‌م بكه‌یگن
زام دڵ له ناو ده‌روینم خوه‌یگن
هه‌ى هووى تواى تیمار بوو ده‌ردم
بیلا جوور ئه‌ڤداڵ ئه‌را خوه‌م بگه‌ردم
تاوه ئه‌و ڕووژه له عه‌مرم ماگه
چاره‌ى به‌دبه‌ختم له‌یوا نویسیاگه
